Tzüyim level atuba ajanga India nunger million 40 kongshitsü

UN, May 20 (Agencies): Yimtitem nung bulua litepba aser rongsenkettsüng ainba ajanga 2050 küm tashi nung tzüyim level atuba ajanga India nunger million 40 shi kongshitsü akok, talisa Mumbai aser Kolkata tzüyimküm nung alirtem timba kongshitsü, ta UN environment report ka ajanga ashi.

Global Environmental Outlook (GEO-6): Regional Assessments ajanga ashiba agi, alima tzümopung melenshiba ajanga Pacific aser South aser Southeast Asia tamajungba kongshitsü.

2050 küm tashi nung tzüyim level timba akumba ajanga nütsüng timtiba kongshitsü aliba linük 10 nungi linük 7 bo Asia Pacific tesem nung lir.

Iba chart nung India temaba jenjang nung nisung million 40 tashi lir, tanabuba nung Bangladesh nung nisung millon 25 dak tema, China nung nisung million 20 aser Philippines nung million 15 jungnua lir.

Kasa osang ajanga, nisungtem tesem melenshia aliba yimya, jila/yimtitem nung bulua litepba aser Asia nung nung lokitiliba-rongsenkettsüng jenjang nung ajemdaker nisung timtiba kongshitsü.

“Tarutsü nung China, India aser Thailand ama linük kar tamajungba kongshitsü, yimtitem nung bulua litepba aser rongsenkettsüng ainba ajanga talisa yimtitem nung kongshitsü,” ta report nung shia lir.

2070 küm tashi nung tzüyimkümlen tzü metsüngba ajanga India nung Mumbai aser Kolkata yimti na, China nung Guangzhou aser Shanghai na, Bangladesh nung Dhaka, Myanmar nung Yangon, Thailand nung Bangkok aser Veitnam nung Ho Chi Minh City aser Hai Phong yimtitem nung aliba nütsüng timba kongshitsü. Item yimti aika tzümetsüng agi kongshitsüsa lir, ta report nung shia lir.

2011 küm alima tzümopung melenshiba ajanga tamajungba kongshiba linük 10 nungi linük 6 bo Asia aser Pacific nung liasü. 2050 küm tashi nung yipru aittsü tesemtemji Bangladesh, China, India, Indonesia aser Philippines linüktem, lir aser item linük ajak senteper nisung million 58 kongshitsüsa lir.