U-19 World Cup: Bangladesh-i 3 buba jenjang angu

India o West Indies na tanü final asayatsü

Fatullah, February 13 (Agencies): Bangladesh teloki wicket 3 agi Sri Lanka telok madak takok ngua tang tasayadak ICC Under-19 Cricket World Cup asayamong nung 3 buba jenjang angur telok tanü, Honibar nü kümogo.
Sri Lanka telok nem ajak agi runs 214 agütsüba sülen skipper Mehidy Hasan-i kanga junga shilem agiba ajanga par Bangladesh teloki ball 3 anünga alidang Sri Lanka teloki yangluba runs-ji ajangteta asaya kokadok.
Mehidy-i tanü asaya nung wicket 3 agiba den külemi, par batsman rong nung runs timba, 53 tashi yanglua asayaba ajiteta pa tanü asaya nung Player of the Match shim.
Külem asayar, Nazmul Hossain aser Jaker natia runs 40 aser 31 yanglua liasü.
Ano külen, India aser West Indies telok na tsüngda final asaya asüng, Deobar nü Mirpur nung asayatsü terenemshiba agia lir.
Rahul Dravid-i coach asüba India teloki tan agi 5 benbuba U-19 World Cup final nung shilem agitsü jenjang ngua lir.
India teloki final asayaji kokra, par teloki Australia telok ajangteta 1988 küm nungi tenzükba U-19 Cricket World Cup takok marok timba angur telok akümtsü.
2008, 2000 aser 2012 densema, India teloki tanü tashi nung U-19 Cricket World Cup takok marok 3 ben tashi agizüka lir.