U-19 World Cup: India teloki Nepal akok

Dhaka, February 01 (Agencies): India teloki wicket 7 agi Nepal madak takok ngua tang tasayadak ICC Under-19 cricket World Cup Group D tatembangba asaya Bangladesh kübok Dhaka nung tanü, Hombar nü asayaogo.
India teloki tan takok anguba sülen par Group D asaya ajunga nung takok angur telok kümogo.
Tanü asaya nung opener, Rishabh Pant-i ball 24 nung runs 78 yanglua par India telok nem takok ngudaktsü.
Sandeep Sunar, Rajbir Singh aser Avesh Khan nungeri runs 37, 35 aser 3 yangluba densema, par Nepal teloki overs 48 nung runs 169 yanglu.
Tesülen, Rishabh aser captain Ishan Kishan nati runs 78 aser 52 yangluba densema, par India teloki overs 18.1 nung runs 175 tashi yangluba kanga junga asayaba yong par teloki tanü takok angu.
Rishabh-i tanü ball 18 nung runs 50 yangluba sülen U-19 international asaya otsü nung tekaraba mapang nung half-century yanglur asayar küma otsü tasen ka yanglur lir.
Rahul Dravid-i coach asüba India teloki Group A nungi Bangladesh mesüra Namibia den Super League quarterfinal tan February 6 nü asayatsü.
Tanü tamakok anguba Nepal telokia Bangladesh aser Namibia na tsüngda asüng, Mongolbar nü asayaba asaya nung takok angur telok den tan February ita 5 nü quarterfinal asayatsü.