U-19 World Cup nung West Indies-i takok nguogo

Mirpur, February 14 (Agencies): Tan tembangba under-19 Cricket World Cup final asaya nung Deobarnü West Indies-i India madak takok nguogo. India nungeri tan ya akok asübo pezüben buba iba World Cup abener süla.
West Indies-i iba final asaya nung India madak wicket pongu agi takok angu aser iba ya parnok asoshi U-19 asayamung nung mezüng takok angurba lir.
Iba asaya nung India team mezüng batting amen aser parnok over 45.1 nung runs 145 dang yangluteter ajak out süadok. Team nungi Sarfaraz Khan-i ball 89 nung runs 51 yanglubaji timba liasü.
Rahul Dravid-i coach asüba India team-i West Indies team batting amenba mapang kanga meranga bowling asü saka parnoki over 49.3 nung India nungeri yangluba runs ajateta yanglu.
West Indies nungi Keacy Carty ball 125 nung runs 52 yangluba atema pa nem Man of the Match sempet agütsü. Pa den yaritepa Keemo Paul-i ball 68 nung runs 40 yanglu (not out).
West Indies nunger batting asütsü tenzükdang opener Gifron Pope-i runs 3 aser Tevin Imlach-i runs 15 ta dang yanglutet. Ajisüaka captain Shimron Hetmyer-i runs 23 yangluba ajanga asaya tera jangratema aküm aser iba sülen tanem tanemi asayaba ajanga iba takok marok tulu angu.