U-19 World Cup: West Indies telok quarterfinal-i iogo

Mirpur, February 02 (Agencies): West Indies teloki runs 2 agi Zimbabwe telok madak takok ngua tang tasayadak Under-19 cricket World Cup quarterfinal asayatsü jenjang tanü, Mongolbar nü ajangzükogo.
West Indies bowler, Keemo Paul-i tatembangba Zimbabwe batsman, Richard Ngarava ‘Mankad’ süa asayadak nungi tugudaktsüba sülen West Indies teloki tashishitsü akettsüsüa tanü asayaji akok.
Tesüiba mapang, 1947 küm December ita 13 nü India aser Australia na tsüngda Sydney nung 2 buba Test asayadang tatalokba ka atalokba sülen ‘Mankad’ ya cricket asaya den sentaktepa amshitsü tenzük.
Iba asaya nung India bowler, Vinoo Mankad-i ball moni atar külen, tejakleni asemtsü tenzüksang, Australia batsman, Bill Brown asayadak nungi tugudaktsü aser iba mapang nungi tenzüka batsman kati tejakleni asemtsü tenzükdang ball stump nung onlokja asayadak nungi temaleni tugudaktsüba dang ‘Mankad’ sütsür ta jembir.
Tanü asaya nung Zimbabwe teloki takok angutsü asoshi runs 3 agitsü nungdaka alidang West Indies fast bowler, Paul-i tatembangba over aontsü tenzük.
Paul-i 1 buba ball aontsü tenzük saka pai ball-ji mondoki stump nung inokba bail tepdokja tejakleni melungi jajatsü tenzüksang, Ngarava asayadak nungi temaleni tugudaktsü.
Tesülen, Umpire-temi olemtepba sülen Ngarava ‘Mankad’ süa asayadak nungi tugudaktsübaji agizük aser iba yongji West Indies teloki runs 2 agi tanü asaya koka quarterfinal nung asayatsü jenjang angu.
Tesülen, Australia coach, Darren Lehmann; New Zealand cricket asayar mongin, Stephen Fleming na densema, cricket asayartemi tanü ‘Mankad’ süa Ngarava asayadak nungi tugudaktsüba atema mepelaba olen ka Twitter ajanga metetdaktsüogo.