US kübok California nung tentetba Ranco Mirage nung amenba Association of Southeast Asian Nations (ASEAN) summit nung US Tir, Barack Obama (Tiyongtsü)-i o jembia shilem agiba noksa nung angur. (Rancho Mirage, February 16)
Rancho Mirage, February 16 (Agencies): Tang US kübok California nung tentetba Rancho Mirage nung temendak US-Association of Southeast Asian Nations (ASEAN) senden nung shilem agirtemi anogo tanabuba, tanü Mongolbar nü South China Sea (SCS) mangatettep ken o tongtipangsüa benoka jembiba osang jangjaogo.
Yashi mezüngbuba anogo nung US Tir, Barack Obama aser Southeast Asia nung tentetba linük lenirtemi shishilembatsü aser rongsenren jenjang tajungba akümtsü onük benoka jembiba sülen par shishilembatsüren jenjang maneni tajungba kümdaktsütsü nükjidong nung SCS ken o bentettsü onük tanü benoka jembiba osang angazükogo.
Beijing den adokba SCS ken o angatetteptsü asoshi Southeast Asian linüktem aroki lungjemtsü asoshi tanü pangjemogo.
ASEAN nung densemba linük aikati China den SCS ken o benoka lir saka iba ken o bentettsü asoshi tasa aser lenmang bushitsüren nung parnoki obang ka mesüteti lir.
China-i alima temzüng ozüngi latettsüba ama inyaktsü aser mangatettepbaren ajunga yimjung sentongtem ajanga bentettsü ajungshitsü asoshi US-i onük benokogo.
“Tan senden nung shilem agir ASEAN lenirtemi aroki lungjemer China-i alima temzüng ozüngi melaba ama inyaktsü aser mangatettepbaren ajunga yimjung sentongtem ajanga bentettsü ajungshitsü onük benokogo,” ta White House national security advisor, Susan Rice-i osang jangjashitsü.
Ano külen, ASEAN linüktem rong nung shishilembatsü tesendaktep aser rongsenren terelok lidaktsütsü nükjidong nung IBM, Microsoft aser Cisco nunger densemba tongti shishilembatsü teloktem nungi Chief Executive Officer (CEO)-tem yashi senden nung jaokba osanga jangjaogo.
You must be logged in to post a comment Login