UAE-i 2117 tashi nung Mars nung mezüng yimti yanglutsü

Dubai, February 16 (Agencies) : 2117 tashi nung United Arab Emirates (UAE)-i international loktitem aser scientific rejutem den lokteper ‘Red Planet’, Mars nung mezüng yimti yanglutsü.
Mars 2117 Project indang ya, UAE nung Tatong Tir aser Ato Kilonser, UAE yimsüsür, Sheikh Mohammad Bin Rashid Al Maktoum aser Abu Dhabi Crown Prince aser UAE Armed Forces nung Deputy Supreme Commander, Sheikh Mohammad Bin Zayed Al Nahyan nati Mongulbarnü metetdaktsü, ta osangbenertemi ashi.
Linük atema küm 100 tsüngda inyaktsü lateta ayuba inyakyim dak ajemdaker UAE-i linük nungi scientific tsütsü mongintem ajanga nüburtem ‘Red Planet’ tashi tutettsü maongka lapoktsütsü sentong lir.
Küm 100 tsüngda inyaktsü lemtetba maparen nung scientist tem dena UAE nung bushisüngdangertem space science nung mongin kümdaktsütsü sentong lir.
Iba sangdong ya World Government Summit nung sorkar züngsem 138, tongtibang international lokti trok aser tongtibang international tech company tem lia metetdaktsü.
Project tasenba ya bushisüngdang inyakyim dak ajemdaker Mars tashi olioratsü, tashi aser chiyungtsü tsütsü kanga junga asadangtsü. Parnoki Mars tashi kodaser tekaratiba nung oli aruli sütettsü ibajia bushitsü merangtsü.
“Meimchirtem tanga planet kati aotsüji alemli nungi pungmang amaka bilema liasü. Ajisüaka iba pungmangji asangsang kümdaktsütsü atema UAE-i anir international loktitem den meranga inyaktsü,” ta Sheikh Mohammad Bin Rashid.
Sheikh Mohammad Bin Zayed-i, iba nükjidong ya Emirates nunger tashi aser inyakyim renloktsü mechi nung latetba lir, ta ashi.
2117 Mars project ya mapang agiba project ka asütsü aser iba jagi onok education, universities aser research centre tem mezüng renloktsü koba ajanga Emirates lanurtem scientific tsütsü inyakyim ajak nung tagitsü akaba nisung kaka akümtsü,” ta pai ashi.