UAE National Programme for Tolerance nung Khristan tem adentsü ayonger

Abu Dhabi, January 18 (Agencies) : UAE nung Minister of State for Tolerance, Sheikha Lubna Al Qasimi-i lar linük nung Khristan teloktem dang tawa National Programme for Tolerance sangoktsüba nung shilem agitsü ayongzükogo.
UAE kübok Sir Bani Yas asetkong nung Gulf Christian Fellowship (GCF) senden nung lai iba osang metetdaktsü.
Iba sentong ya Abu Dhabi Crown Prince Court aser National Programme for Tolerance nati ayongzüka agi.
“National Programme ya Islamic faith, UAE Constitution, linük tenzüksang asür Sheikh Zayed Bin Sultan Al Nahyan indang senmang aser UAE loktiliba sendaktepba tangatetbatem nung ajemdaker yangluba lir” ta Sheikha Lubna-i ashi.
“Asenoki Emirates nung iba mapa inyakba nung nisiung ajak, telok ajaki shilem agitsü ayongzüker. Onoki UAE nung aliba Khristan telok balala dang shilem agitsü ajungshir” ta laisa shisem.
UAE, Oman aser Yemen atema Vicar Apostolic, Bishop Paul Hinder-i Sheikha Lubna dang pelaba ashi aser paisa His Highness Sheikh Mohamed Bin Zayed Al Nahyan nem tenüngsang agütsü.
“Sheikh Mohamed Bin Zayed Al Nahyan-i nungitba ajanga iba senden alir” ta Paul Hinder-i ashi.