UAE nung alir India tsür kati Children’s Peace Prize agizük

United Nations tesepti, New York yimti nung alima wazüka ayutsü atema taküm bendang agüja inyaker, India’er tetsür chanu, Kehkashan Basu-i Nobel Peace Prize agizüker, Muhammad Yunus ket nungi 2016 International Children’s Peace Prize agizükba noksa nung angur. (New York, December 03)

United Nations, December 03 (Agencies): United Arab Emirates (UAE) nung alir India’er tetsür chanu kati 2016 International Children’s Peace Prize yashi, Hokolbar nü agizükogo.
Alima wakzüka ayutsü atema bendanga agüja inyakba nüngtem nung arishi küm 16 tain school kaketshir, Kehkashan Basu nem iba nungtugu sempet ya agütsüogo.
United Nations (UN) yimtiba, New York nung sentong tajung ka agia, Nobel Peace sempet agizüksang, Mohammad Yunus-i Basu nem Children’s Peace Prize-i agüja liasü.
Basu-i arishi küm 8 tain aliba mapang nungi tenzüka, la alidak, Dubai kübok tentetba kiyongertemi jana oda meindoki kasaji tanaben amshitsüsa inyaktsü asoshi ajungmesoa nungdakba maparen inyaka aruba aser nüburtemi tanaben amshitetba osettsüset melalutsü osang prokshiba osang bushitetogo.
Lai 2012 küm lar tentet, Green Hope tenteta, alima wazüka ayutsü mapatong balala takok ngua inyaka aruba aser UN Environment Programme kübok tentetba Major Group for Children & Youth mapatong nung bendanga agüja inyaker tanutsütila akümba osanga jangjaogo.
Basu-i alima jenjang nung ayongba mongdang aika nung onük jembia, lenirtem alima wazüka ayutsü ajungmesoba aser lar Green Hope tentet indang kongsang alima linük 10 dak tema nung tentetba den la lenisüba kübok peisasa mulungteta alima wazüka ayutsü atema inyaker nisung 1000 dak tema akümba osang tejangja lir.
“Basu ama tanur kati alima nem tajangzük tulu bener arutsütsüsa bendanga agüja inyakba atema la nem tetushi agütsür. Alimar tarutsü jenjang tajungba kümdaktsütsüji meimchir ajunga indang arok khuret aser tebilemtsü ta Basu nungi angazüker,” ta Yunus-i sempet agütsüba jakdang metetdaktsü.
“Basu-i alima melenshija, tajangzük tulu bener arutsütsüsa lar Green Hope tentetba atema la nem Children’s Peace Prize agütsütsü renem,” ta Netherlands kübok Amsterdam nung tenteta, 2005 küm nungi tenzüka, tetemsu tanurtem nem nungtugu sempet agütsür tentet, KidsRights Foundation tentetsang, Marc Dullaert-ia metetdaktsü.
“Alima wazüka ayutsü aser tarutsü jenjang tajungba kümdaktsütsü atema tanur aser tain ajunga maneni ajungmesotsü alizüng lir,” ta UAE aser Canada na nung melentepa alila, Basu-ia sempet agizükba sülen metetdaktsü.