UAE nung mezüngbuba Robot Pharmacy sayaogo

Dubai, January 14 (Agencies) : United Arab Emirates (UAE)-i parnok indang mezüngbuba “robot pharmacy” Rashid Hospital, Dubai nung sayaogo, ta Hokolbarnü osangbenertemi metetdaktsü.
UAE nung aliba iba smart pharmacy nung mozü agütsütsü atema robot tem tenyar aser itemji bar code teküpoklen aliba tanemtsü ka nung anemba ajanga inyaker. Robot tem yangi nisungi inyakdang tilala aibelenba ama aibelen masütsü, ta UAE state news agency WAM-i ashiba Xinhua osang ajanga metetdaktsü.
Iba robot yagi Deobarnü nungi tenzüka customer tem yaritsü aser item robot yagi mozü 35,000 züngoka yuteter aser minute ka majungdang prescription 12 tashi agütsütettsü. Anungji iba inyakyim ajanga mozü alitsü arurtem mapang talanglang ata makazüdaktsütsü.
Dubai Health Authority (DHA)-i, “Memunui onok mozüki ajunga nung robot amshiba yimya sübatsü sentong lir,” ta ashi.
Iba robot ya smart technology inyakyim tesüsabuba lir aser 2016 nungi 2021 tashi nung tepela aser anema aliba lokti akümtsü nükjidong nung tenzükba lir, ta DHA-i ashi.
Arab linüktem rongnung digital economy tsütsü tejaklen asütsü nükjidong nung UAE lokti tesem aika nung robot tem yua lir.
Dubai international airport nung robot temi passenger tem den salem lemsateper aser iba den külemi ano Dubai sorkari mezüngbuba nisungi maniba gari kar alima nung ki talangtiba, Burj Khalifa nung aliba Business Bay nung tendangdar.