UAIPF-i PRC onük nung longkak ait

Itanagar (Arunachal Pradesh), February 10 (Agencies): Arunachal Pradesh kübok Namsai district nung APST masüba nisungtem nem permanent resident certificates (PRC) agutsütsü atema chief minister aser deputy CM nati jembiba o agienang, ta takhangba agüja tanü United Arunachal Indigenous People’s Forum (UAIPF)-i state yimtiba, Itanagar nung Nirjuli nungi Indira Gandhi Park tashi longkak aita senzü.
Yaküm December 14 nü Vijaynagar nung lokti senden ka nung jembidang Chief Minister Pema Khandu-i, Namsai aser Changlang districts nung alir non-Arunachal Pradesh Scheduled Tribe (APST) trok aser Vijaynagar nung alir Gorkha nunger nem state sorkari PRCs agutsütsü atema asadangdar, ta metetdakja liasü.
Ajisüaka paisa, iba atemaji lisopurtem den jembitepa inyaktsü, ta metetdakja liasü.
December ita nungsa Deputy Chief Minister Chowna Mein-ia, non-APSTs nem PRCs agutsübaji parnok atema küm tasen sempet ka asutsü, ta jembia liasü.
Tanü osangbenertem den jembidang UAIPF Tir, Laffe Paffa-i, Khandu, Mein aser taoba minister Bida Taku nungeri lisopurtem den masayatsüla, ta ashi.
Paisa, Khandu aser Mein nati tenati nangzükba meyipa agitsüla aser Mein-i meshisadangi o jembiba atema pa menden nungi anentsüla, ta ashi.
UAIPF-isa, lenirtemi lisopur akhüm metsübura parnoki state sorkar den amalitep malitsü aser democratic yimya balala nung longkak aittsü, ta metetdaktsüogo.
State nung Scheduled Tribes (STs) jenjang nung malirtemi parnok-a state nung küm aika lia arudar, anungji parnok nem PRC agutsütsüla, ta akhanger. Item kin rongnung Deoris, Sonowal Kacharis, Morans, Adivasis aser Mishings densema lir. Assam nungbo item kin aika nem ST jenjang agutsüogo.