UCC nung Naga nunger asoshi timtem lir: NDPP

Dimapur, Aami/June 29 (TYO): Uniform Civil Code (UCC) mapa kuma amshitsü asoshi asadangtsü atema Government of India-i tentetba 22nd Law Commission of India ajanga June 14, 2023 nü sangdongba dak sendakba nung Nationalist Democratic Progressive Party (NDPP) tangatetba lemsatepa liasü.

NDPP sangdong ka ajanga ashiba agi, UCC mapa kuma amshiba ajanga India nung aliba kin tilatem aser tenem nung alirtem (tribal) indang temeden nung timtem ajurutsü ta angateter. Anatsülen nungi political agreement ka zülutepba ajanga Nagaland ya Indian Union nung state 16 buba akum aser Government of India-i Naga nunger timtemba aser puti otsü angateta state tejangja ka akum. Constitution of India nung Article 371 (A) inokba ajanga asen Naga nunger sobaliba aser yimsü wazüka ayur, ta NDPP ajanga ashi.

Ano yimjung aser ajaki akumtsübotsüsa Indo-Naga yimten ken o jembia aruba tongtipang lemjem ka nung lir. Anungji iba ama mapang ka nung UCC ama ozüng benoktsü ya shisa maka, koba ajanga küm 26 tashi yimten ken o jembia aruba nung timtem tulu ajurutsü. Mapang talangka mepetmesü aser azüdokshi ajangshia arur tanü Naga nungeri teti asoshi yimjung aginer. Ajisüaka ozüng tasen benokba ajanga nüburtem indang ‘personal laws’ nung kongshia ano tali ang tejangja makaba jenjangi yoktsü aser tesunep samatsütsü akok, ta NDPP sangdong ajanga ashi.

Constitution of India nung wazüka aliba aser Preamble nung shia aliba ama, India ya Secular Democratic Republic lir, kong tesendaktep temaba jenjangi ajungkettsü, nisung kija shia akumtsübotsü, aser linük ajunga ka kuma lungjemtsü nangzüka lir. Kin telemsa balala tsüngta telungjem nung aliba ya India indang maitsü ka lir, aser asenok ya sentsü aser tabu balala aliba naro tebong tebour tajung ka ama repranger, aser asen linük ya sobaliba aser yimsüyimbong balala amshiba nüburtemi kumtetba lir, anungji nübur ajunga asoshi civil code benokba ajanga linük nükjidong nung temetetba timtem ajurutsü, ta ashi.

Iba ya ajanga temetetba telemsa adokdaktsütsü aser ibaji linük ka kuma lungjemtsü asoshi majung asütsü. Iba dak alia linük nung kin aika Indian Union den temolungsentsü ka kuma melungjemteti lir. Item nüburtemi tang tashi mainland nung amshiba yimsü, sobaliba aser tamangba yimsü ya khenyongi balaka ama züngshir, ta NDPP ajanga ashi.

Indian Constitution tamendak dak federalism ya shilem ka lir, aser ibaji kodanga memelenshitsüla mesüra meraksatsüla aser India tangatetba ya kin ajak akumtsüboa, aremzüktepa tamangba yimsü ajunga agizüktetba nung amendaka lir.

Anungji item kuli ajak asadanger asen nübur temeden, sobaliba aser yimsüyimbong wazüka ayutsü tangatetba aliba political party ka ama NDPP-i UCC maka kuma amshitsü memolunger.

Anungji UCC asangsang nung amshitsü asoshi inyakyim tang ang tenzüker asünung, NDPP ajanga Government of India aser 22nd Law Commission züngsemtem dang iba ken o asadangshitsü aser 21st Law Commission telemtetba memelenshitsü ajungshir, ta NDPP sangdong ajanga ashi.

Nagaland sorkar tangatetba kodang meshidir, asenoki Naga nunger asoshi bendanga agütsür inyakba manokshitsüla saka akang-akanga nokdaker asen ayak, asen sobaliba, yimsüyimbong aser asen puti otsü wazüka ayutsü Nagaland sorkar dang ayongzüker, ta NDPP sangdong ajangasa ashi.