UCM-i Naga nunger anema noktaker : MIP, NSCN/GPRN

Dimapur, October 4 (TYO) : October 2, 2016 nü United Committee Manipur (UCM)-i osangkaket kar nung osang adokbaji Naga nunger yimjung telatetba ka bushiba anema lir, ta MIP, NSCN/GPRN-i tanü sangdong ka nung metetdaktsü.
Indo-Naga ceasefire ya India sorkar (GoI) aser National Socialist Council of Nagalim (NSCN) tsüngda lir. Iba onük ya India aser Naga nunger tsüngda lir aser nenoki aginüaka mesüra maginüaka Manipur State jia India küboksa lir, ta MIP sangdong nung shia lir.
September 28, 2016 nü Senapati nung 35th Assam Rifles-i NSCN züngsem 3 pur chiokba anema UCM-i public ajungmesotsü meranger. Naga Army asemji kuli tejangja kecha melii apuba lir aser parnok dak tai tongloktsütsüsa kuli kecha mongutetba agi chiok, ta sangdong nungsa metetdaktsü.
UCM-i Manipur state nungi Armed Forces Special Power Act (AFSPA) agienang ta takhangba agütsür saka ano külen parnoki NSCN aser GoI tsüngda ceasefire agibabo anemer aser iba tangatetbaji ajanga parnoki NSCN aser India Army tsüngda raradaktsünüba sayur, ta MIP-isa metetdaktsü.
UCM ya onük meputepi jembiba telok ka lir kechiyong külen parnoki ceasefire mali ta jembir saka ano külen NSCN-i Manipur nung ceasefire ground rules alema mapa inyaker ta jembir aser iba ya temangmangtsüka lir. Tesem balala nung Naga Army rashia alibaji pei temeten aser nübortem kümzüka ayutsü atema lir. Iba asoshi Meitei nunger den kecha sendaktepa mali. Onoki Meitei nunger litsü meshirba masü saka tetsü-tebou mapang nungi Naga nunger ali meshirba dang lir, anungji UCM-i arentaka mebilemtsüla, ta MIP, NSCN/GPRN sangdong nungsa metetdaktsü.