Uddhav Thackeray (CM) den Minister 6 tenangzükba agi

Mumbai, November 28 (Agencies): Brihostibar nikongdang Shivaji Park, Mumbai nung Shiv Sena Tir, Uddhav Balasaheb Thackeray-i Maharashtra Chief Minister inyaktsü atema tenangzükba agiogo; State Angh, BS Koshyari-i ketdangsüa arishi küm 59, Uddhav Thackeray nem tenangzükba agidakja liasü.
Uddhav dak alia party asem teloktep nung lenirtem: Congress nungi Balasaheb Thorat aser Nitin Raut na, NCP nungi Chhagan Chandrakant Bhujbal aser Jayant Rajaram Patil na aser Shiv Sena nungi Eknath Shinde aser Subhash Desai nungeria Minister inyaktsü atema tenangzükba agi.
Tenangzükba agiba sülen Uddhav Thackeray-i sabang nung mokremer tekolak agi atem nung kongshia Maharashtra nüburtem dang pelaba metetdaktsü.
Maharashtra nung assembly election osang sangdongba sülen party kati danga sorkar mekümteti ita ka jungnüa arur Uddhav-i state nung 18buba chief minister inyaktsü atema tenangzükba agir.
Tenangzükba agiba sülen aonung 8:00 ako nungi pa leniba nung cabinet senden amen.
Shiv Sena party nungi Manohar Joshi aser Narayan Rane nati Maharashtra CM inyakba sülen party nungi tasembuba CM ji pa asütsü aser Thackeray kibong nungibo pa mezüngbuba Chief Minister asütsü.
Chief Minister menden onük nung Shiv Sena aser BJP teloktep nung mangatettep adoka Shiv Sena-i BJP toktsü aser Nationalist Congress Party aser Congress na teyari agia sorkar kümogo.
Tenangzükba agiba sentong nung DMK tongti, MK Stalin, Madhya Pradesh Chief Minister, Kamal Nath, Congress lenirtem- Ahmed Patel, Kapil Sibal, Abhishek Manu Singhvi, Mallikarjun Kharge nunger den MNS tongti, Raj Thackeray aser taoba mapang state chief minister, Devendra Fadnavis nunger densema liasü.
Congress lenirtem- taoba Ato kilonser Manmohan Singh, Congress Tir Sonia Gandhi aser party lenir Rahul Gandhi nungera iba sentong nung adentsü jaoka liasü saka medentet.
Tanep Shiv Sena-Congress-NCP teloktepi sorkar inyakyim lenitsü atema aluyimertem tebilemtsü, mapa manguba tebilemtsü aser health & industry sectors nung rangloker Common Minimum Program (CMP) sayaa liasü.