Uddhav Thackeray-i Amit Shah o magizük

Mumbai, June 18 (Agencies): Shiv Sena tanishir Uddhav Thackeray-i Bharatiya Janata Party (BJP) tir Amit Shah dang tamasa presidential candidate indang tenüng yimjak nung metetdaktsü atema ashi ta osang angazüker.
Deobarnü Thackeray aser Shah na ajurutepa senden amendang Thackeray-i presidential candidate tenüng metetdaktsüba sülen ang BJP den yaritepba teloktem dang nungi teyari meshiang ta ashi.
Prime Minister Narendra Modi-i tir menden atema NDA candidate shimtsü ta Shah-i ashi. Idangji Sena tanishisangi tir indang nübo metetdaktsüba sülen ang parnok tebilemba metetdaktsütsü ta ashi, ta Shiv Sena osang ka ajanga metetdaktsü.
Tanep Maharashtra Chief Minister Devendra Fadnavis-i Shah meiner Thackeray’er ‘Matoshree’ kidangi ao aser ghonda ka ser tesadang ka shi senden amen.
BJP tir Shah-i Maharashtra nung anogo asemnü amungtsü atema arua lir. Maharashtra nung BJP akangshitsü atema pa aru aser pai ashiba agi, NDA indang presidential candidate meshidang, tamasa parnok den yaritepba teloktem den asüngdangyatsü.
Shiv Sena ya BJP den yaritepa arur telok rongnung tejenba lir aser taoba mapang parnoki tir menden atema “independent” lenmang shimtsü akok ta metetdakja lir.
Tesüiba presidential elections ana nung parnoki Congress nübotem- Pratibha Patil aser Pranab Mukherjee na pusema nungit.
Shiv Sena-i BJP aser Modi’er sorkar anema onüktem jembia arur aser tawa tu parnoki Tir atema MS Swaminathan (father of India’s Green Revolution) shim nung junger ta metetdaktsüogo.