UEFA Champions League: Barcelona-i goal 6-1 agi AS Roma akok

UEFA Champions League Group E asaya nung Argentina nunger Lionel Messi-i par Barcelona telok asoshi 2 buba goal agütsüba sülen külem asayar, Neymar aser Luis Suarez na den pelatepba noksa nung angur. (Barcelona, November 25)

Barcleona, November 25 (Agencies): Luis Saurez aser Lionel Messi nati goal anana agütsüba densema par Barcelona teloki goal 6-1 agi AS Roma telok ajemshia koka yashi Mongolbar nü UEFA Champions League asaya nung shilem agiogo.
Tan takok anguba densema, Barcelona teloki asaya 5 nung ajak agi points 13 tashi ngua par Group E telok nung temaba jenjang nguogo.
Par Barcelona teloki temaba jenjang anguba den külemi, tan asayamong nung shilem agir tatembangba telok 16 rong nung densemtsü jenjang ngua tan agi 12 ben tashi iba jenjang tajung atonga ajangzüker telok kümogo.
Yashi asaya nung Gerard Pique aser Adriano natia goal kaka agüja liasü.
Yashi asaya tenzüker minute 15 buba nung Saurez-i par telok asoshi goal 1 agütsür minute 3 süir külen Saurez-isa Messi nem pass tajung ka agüja Messi-i par Barcelona telok asoshi 2 buba goal agütsü.
Asaya mezüngbuba shilem tembangtsü minute 1 shi anünga alidang Suarez-i par telok asoshi 3 buba goal agütsü aser asaya tanabuba shilem tetenzüklen Messi-i pass tajung ka renemja külem asayar, Pique nem 4 buba goal agütsüdaktsü.
Messi-i maneni minute 60 buba nung par telok asoshi 5 buba agütsü aser tesülen, minute 77 buba nung Adriano-i par telok asoshi 6 buba aser takokba goal agütsü.
Roma striker, Edin Dzeko-ia asaya tembangtsü mapang nung par telok asoshi goal 1 agüja liasü.