UEFA Champions League: Real Madrid-i goal 8-0 agi Malmo akok

Madrid, December 09 (Agencies): Cristiano Ronaldo-i goal 4 aser Karim Benzema-i goal 3 agütsüba densema, par Real Madrid teloki goal 8-0 agi Malmo telok madak takok ngua tang tasayadak UEFA Champions League asayamong group asaya yashi Bodbar nü asayaogo.
Portugal nunger Ronaldo-i yashi goal 4 agütsüba sülen pa UEFA Champions League group asaya nung goal timba agütsür asayar küma otsü tasen yangluogo.
Ronaldo-i tan asayamong indang group stage asayatem nung ajak agi goal 11 agütsür küma, Shakhtar Donetsk tenati goal 9 tashi agüja 2013/14 asayamong nung yangluba otsü ajangteta goal timba agütsüba otsü yanglur lir.
Külem asayar, France striker, Benzema-ia küm 5 tsüngda nung tan mezüngsüa hat-trick yanglur lir.
Madrid teloki taoba November ita goal 0-4 ngua Barcelona telok nem takok ngudaktsüba sülen tan agi asaya 5 buba atonga akoker lir.
Yashi asaya tenzüker minute 12 buba nung Benzema-i par telok asoshi 1 buba goal agütsüba sülen asaya mezüngbuba shilem tom nung Ronaldo-i yanglutsüba cross ball agizüka par Madrid telok asoshi 2 buba goal pa tekolak agi tongoktsü.
Tesülen, Ronaldo-i par Madrid telok asoshi goal 2 ben tashi agütsütsü merang saka Malmo goalkeeper, Johan Wiland-i ball anapronglaji pua goal magütsüdaktsü saka arishi küm 34 tain Ronaldo-i tatem nung par telok asoshi 3 buba goal agüja liasü.
Ronaldo-i asaya tanabuba shilem tenzüker minute 14 tsüngda nung maneni goal 3 tashi atonga agüja par Madrid telok goal 6-0 agi temaba jenjang nung ajungkettsü.
Croatia International asayar, Mateo Kovacic-ia Madrid telok nung züngsemtsü tenzüker tan mezüngsüa par telok asoshi 7 buba goal agüja liasü.
Tatem nung Benzema-isa goal 8 buba agüja par Madrid telok nem takokba bener arutsü.