UFC nung tsüngteper Ronda Rousey aser Travis Browne-na aniasüng süogo

California, April 21 (Agencies): Taoba mapang UFC nung tetsür ‘bantamweight champion’, Ronda Sousey aser tetong Travis Browne-na kibong akümtsü asoshi aniasüng süogo.
Arishi küm 34 tain, Travis-i Olympic nung takok ngua alila, arishi küm 30 tain, Rousey da taoba hopta New Zealand nung südoksünema senzüba mapang aniasüng.
Ronda ya diamond indang küri ka inoker angu, saka la kibong akümtsü anogobo anu melemtet, ta osangbener dang ashi.
“Kiyimba sentong asoshi anu kicha merinem. Saka ni asoshibo kiyimtsü ji kanga tezüba asütsü. Ni atemabo ki-naro inoktsü menüngdak,” ta laisa ashi.
Ronda-i osangbener den jembiba mapang la ya tetong tar feet 6 inch 7 talang, Travis den külemi menürema nokdaka liasü.
La iba mapang tetsür sübotsü sübor liasü.
Hawaii nung soa intetsang ‘mixed martial artist’ Travis ya Ronda ama kasa UFC nung tsüngteper ka lir.
Taoba küm December ita UFC 207 nung Amanda Nunes den tsüngtepba mapang Ronda Rousey-i makok aser iba sülen ita asem lir lai iba osang sangdong.
Iba tsüngtepba mapang Nunes-i tsüngtep tenzüker second 48 nung Ronda ya akok aser la tetsü tensema nisung aikati la tsüngtepba nungi anentsü asoshi ajungshir.
Tarutsü nung Ronda-i iba asaya nung shilem agitsü mesüra magitsü asoshi anu osang kicha agüja mali.
Holly Holm den 2015 küm November ita tsüngtepba mapang lai tamakok angu aser ita 13 lir 2016 küm December ita nung Brazil tsür Amanda Nunes den tsüngtepba mapanga lai makok.
Lai anaben tashi tamakok anguba sülen lai la-sasa suseta asütsüa molungtet, ta Ronda-i osang ka nunga shia lir.
“Iba tsüngtepba temer ni temang anepaluba dakdang tezülen mena liasü aser küsasa ni tepsüttsü bilemtet. Saka Travis-i ni kanga yariba ajanga tanü ni pela lir,” ta lai ashi.
NBC indang ‘crime drama’, Blindspot nung lai shilem agir aser iba drama asoshi Brooklyn nung noksa kar tangokogo.
Ibai Ronda asoshi mezüngbuba kibong akümer asütsü saka Travis atemabo tanabuba lir. Travis ya mezüngbo ‘fitness model’, Jenna Renee Webb den kibong aküm saka 2016 küm February ita nung bala.