UFC Tir-i Mayweather aser Conor na nem million $25 agütsütsü nangzük

January 14, 2017(Agencies): Floyd Mayweather aser mixed martial arts champion Conor McGregor na tsüngteptsü akok, ta asüba olulu koba dang ayimsünga odar iba olen nung ajemdaker Hokolbarnü UFC tir Dana White-i tena nem pay-pre-view sen den külemi sen million dollar 25 iba asaya asaya nungbo agütsütsü nangzükogo.
“Floyd, ni nü nem iba sen ji agütsütettsü. Onoki nü nem million dollar 25 agütsütsü aser Conor nema million kasaji agütsütsü, iba sülen pay-per-view sen jenjang jembedi,” ta FS1 nung Colin Cowherd’s “The Herd” radio talk show nung White-i ashi.
Sen paikaji agütsütsü nangzükaka, ibaji ajanga Mayweather kecha balaka mejangradaktsütsü südi.
Pa nem million dollar100 aser UFC lightweight champion nem million dollar 15 den pay-per-view nungi shilem ka agütsü nung dang tsüngteptsü, ta iba hopta tetenzük nung Mayweather-i ashi.
“Ni business man ka aser iba jagi business inyakba jangjatsür. Boxing limai pa anir arung aser ni komar sayutsü,” ta küm 39 tain America nungbai ashi. Pa 2015 September nung tsüngtepba nungi anen. 49ben tsüngtepba nung pai khen tanga tamakok ngua mali.
Irish nunger McGregor yagi ita aika Mayweather den tsüngteptsü asoshi jazükdar.
Mayweather-i weight division 5 nung world title akok. Pa küm 19 boxing asayaba nung million $800 aazük, iba rongnung 2015 küm Manny Pacqiao den “Fight of the Century” ta nüngja jateter tsüngtepba nung million dollar 230 shi aateta liasü.