Uganda nung Islam yimsü yutsüba mechi timtem ajuru

Nairobi, Aenjeti/Jan. 03 (Agencies): Uganda anüdoklen Khristan dangi meyipba ajanga nisung ka kinungtsü aser tanur densema tesama jenti ajuru, ta osang ajanga ashi.
Sironko District kübok Masaba yimdak mosque (Muslim nunger tekülem ki) lennir kati anir nisung telok ka Luchii/December 7 nü Muhamud Gusolo’er somomo tsünüba tesemi oa raksatsü aser iba timtem ya Gusulo-i Islam yimsü yutsür Khrista dangi meyipba asoshi tebui tai apuba sülen atalok. Muhamud Gusolo tebu Mujenya Gusolo Zibail-i Yimpoksüi/November nunga pa dang senmang kecha mangutsü aser par li nung tetsüng majemoktsü ozüng agütsür liasü, ta pai ashi.
“Ni Khrista dangi meyipba ajanga ozü kibongi maksü bener arutsür ta kübui ni merenshia liasü,” ta arishi küm 28 tain, Gusolo-i Morning Star News dang ashi.
“Ni ozü kinunger rongnungi meindokba sülen ozü kinunger shinga ni yaritsü maru. Kübui yimjak nung ni par tanur masü ta sangdong aser kinungertemia yimjak nung ni amokmeren aser ‘Na atema asüpila sentonga magitsü’ ta shia liasü,” ta Gusolo-i metetdaktsü.
Iba tesem nung aliba Muslim nungertemi pa amokmerena aser par süngjanglu raksatsüba ngua pa kinungtsü (Muslim tsür)-ia pa Luchii/December 8 nü ki toktsür aodang pa den manidak, ta ashi.
“Kü kinungtsü aser tanurtemi ni anema nokdak. Ni kinunger maliba nisung ka lir. Ozü kinungertemi ni meindokba sülen ni sorkar ketdangsertem dang teyari meshi, saka parnoki mangashi amai yutsür. Ni ozü kinunger dang nungi talangka pilar yimtsüng ka nung alir,” ta pai Morning Star News dang ashi.
Pa kinungtsü aser tanur trok (ana bo taoba mapang pa Muslim ka ama alidang balaba kibong nungi lir) ya taoba hopta tashi tebu nunger den liasü. Saka tanurtemi Khristan ken atenba angashia Gusolo tebui tanurtem aser pa kinungtsü nunger dak temulung melemi aküm.
Gusolo kinungtsü aser tanurtem ya Sirongo jila nung ki kati yok aser parnok taküm liyonga aotsü atema lenmang mali. Tanurtem ya arishi küm ka nungi ter tsüngta lir.
Gusolo-i 2017 küm tatemlen Khrista dangi meyip aser Mongputeni/October nung par kidang taoba mapang Muslim yimsü amangertem den külemi nikongdang Bible study agia Tsüngrem külem tenzükba sülen pa taküm jenjang tamajungba aküm.
Pa tang aliba yimtsüng nung Khristanpur kata mali aser pa Khrista dangi anir arusang pastor ya pa den teti meyariteptetter, kechiaser pa meta talang nung oa alir.
Luchii/December 7 nü par lu raksatsüba ya Uganda anüdoklen Khristanpur nem timtem balala agütsüba yimya ka lir, ta Morning Star News ajanga taoba küm trok tsüngta bushiteta lir.
Uganda constitution aser tanga temzüng ajanga tamangba yimsü temeden agütsür, kong nisung ka tamangba yimsü tangar dang sayutsüa mela lir.
Uganda nütsüng yongsük shilem 12 Muslim nungertem lir.