UK company Dyson-i India nung invest süner

New Delhi, November 07 (Agencies) : Vacuum cleaner, hand dryer, bladeless fan aser heater osettem yangluba British technology company, Dyson-i küm pungu atema India market nung sen crore 1,200 invest asütsü sentong lir.
“Company-i retail asoshi business licence ka atema tenüng agütsüogo. India sorkar dang nungi December ita tashi nung onoki osang angashitsü. Onoki yanglutetba osettemji onok indang retailer dangi yoka ayoktsü anungji 2017 küm tiyong nungi item retail outlet tem lapoktsü asoshi küm pungu atema onoki crore 1,200 invest asütsü. Iba sen ajanga onok meyong retail store tem anepaluba, mapa inyakertem nem taa aser tax agütsütsü,” ta Dyson ngutetsang aser company nung Chief Engineer James Dyson-i IANS dang ashi.
“Sorkar den jembishinüba dak tulu ka keta lir. Mapa shitak kümtet nungbo ano tali invest asütsü,” ta pai osangbenertem den jembiba mapang ashi.
Sorkari mulunga agizük nungbo company nem single-brand retail outlet tem lapokdaktsütsü aser aji mesüra local sourcing noklang nung shilem 30 tongtet nung dang agizüktsü.
Dyson-i, local sourcing noklang nung shilem 30 ji masü saka single-brand retail ajanga India market-i aittsü imlar.
“Tang tangbo koba yimya nung agizüktsüar ano meshitettsü,” ta Dyson-i IANS dang ashi.
India market ajungba ajanga parnoki tajangzük tulu angutsü amai bilemer. Iba company ya US nung tuluba aser iba sülen Japan aser China nung lir.
Dyson-isa, India ya pa atema market tulutiba rongnung tanabuba mesüra tasembuba asütsü imlar, ta shisem.
Alima rangben nung Dyson osettemji sen lakh ka nungi asem tsüngda agi ayoker aser pai India nunga iba jenjang koktettsüpur dak rangloker inyaktsü. India market nung jenjang melenshitsü kecha tebilemba mali.