UK-i India nung puoka alir trok odang yutsür

London, August 07 (Agencies) : Tzü nung rakzükraktemer dang nungi kümzüktsü atema raradang amshiba oset bena aliba ajanga India nung puoka aliba, tesüiba mapang linük sepai trok Britain sorkari odang yutsür, ta sepai rongnung ka indang aianu Lisa-i ashi.
Item sepaitem ji Nick Dunn, Ray Tindall, Billy Irving, Paul Towers, John Armstrong aser Nicholas Simpson nunger lir aser parnok ya 2013 küm apu. India nung court kati iba küm January ita nung küm pongu tepuokdak ayutsü obendang agütsür parnok 35 rongnung par troka densema liasü. Parnok-i bena aliba raradang amshiba osettem license maliba ajanga parnok aitsü, ta Deobarnü Guardian osang ajanga metetdaktsü.
Parnok ya Indian Ocean nung Africa tzüküm ajanger security company ka den tzü nung rakzükraktemer ket nungi shishilembaba rongtem kümzüktsü atema inyakertem liasü.
Tang pua alirtem ya tesüiba mapang Britain Ato Kilonser David Cameron den MP 20-i nungiter aser par trokia parnok dak tai maketba shia iba obendang ageintsü mepishiogo.
Nick Dunn teyi-i, Lisa-i, parnok trok shisatsü nung timtem madokdangsa iba case nung temulung agüjang, ta Britain Ato Kilonser Theresa May aser Foreign Secretary Boris Johnson na dang shiogo.
“Ni tesüiba mapang sepai ka ama tenzüka aliba linük sorkari ni timtem mapang senzüka yutsür,” ta Nick-i ashiba Lisa Dunn-i Guardian osangbenertem dang ashi.
“Tangbo linük nung sorkar tasen ka lirji ni Theresa May, Boris Johnson aser Alan Duncan (Minister of State for Foreign & Commonwealth Affairs) nunger den chitepa ajurteper iba case shishia agiang ta mepishiner, kechiba süra tesüiba mapangtem nunga sorkari nangzükba meinyakteti aruogo,” ta lai ashi.
Britain sorkari semi-automatic G3 assault rifle tem den item raradang amshiba osettem atema license agütsüogo, ajisüaka India nunger item prangpongji automatic ta züngshir, aser iba jagi nokdanger, ta Guardian-i ashi.
Taoba ita Britain sorkar export inyakyim nung tekolakba Edward Bell-i iba mapang business secretary Vince Cable-i item oset ajak atema 2012 aser 2013 kümtem nung license agütsü, ta osang tejangja metetdaktsüogo.
“Iba case dak sentakba nung küm asem tsüngda asen sorkari India nunger nisung aika den jembishiba atema ni kanga pelar ajisüaka kuli tejangja lir sür nung sorkari iba case tembangtsüsa meinyaktetba ya tamangtsü mali,” ta Lisa-i ashiba Guardian-i metetdaktsü.
Yaküma Cameron-i Britain nunger rangben tenüng nung India Ato Kilonser Narendra Modi dang iba case atema reprangshitsü atema temepishiba ka agütsüogo.
India nung aliba tepuokdak tesemji kangasa majung ta angashir. Yangji yipten mali cement agi menokba tesa nung majangdaktsür aser per o koya agi sünga lir. Ano natzü anatsü atema takdang indang atema nung aliba tapok ka nung anar, ta Lisa-i ashi.
Tang puoka alir künungertemi sorkar dangi parnok kümzüka chiokdaktsütsü inyakang ta züluba shidi ka nung nisung 375,000-i sign sür ka taoba hopta Downing Street nung oa sorkar nem agütsüogo.