UK-i IS nung 20 tepsettsü renemer

London, November 29 (Agencies): United Kingdom-i par elite military unit Special Air Service (SAS) ajanga ISIS tongti 20 tepsettsü renemba tarensen agütsür Syria linüki yoktsü, aser iba tarensen nung British tsür ‘Mrs Terror’ densema lir, ta osang ka ajanga ashi.
ISIS lenirtem tepsettsü mission ya Syria nung Islamic State commander tem samatsütsü shilem ka lir, aser ibaji Bodhbar nü Parliament nung vote agütsütepba masadangi inyaktsü, ta Daily Express ajanga metetdaktsü.
Kent nungi tanur ana tetsü Sally Jones ya ISIS kiralongrar telok atema kanga senti lir, aser UK sepaitem nem nisung 20 tepsetttsü lemzüktsüba nungji la densema lir ama angazüker.
Jones kinüngbu Junaid Hussain ya ISIS yimtiba Raqqa nung nisung madenba tayimtsü nungi amakdang tepset.
ISIS anema inyakba nungsa Britain nunger indang nuclear submarine anüdoklen Mediterranean-i yoktsü, aser Tomahawk cruise missile kati Islamic State amenoka aliba tongti Raqqa power base amaktsü, ta kasa osang ajanga ashi.
Tang Special Air Service (SAS) 40 shii Syria nung US Special Force den yaritepdar saka Defence tongti lenirtemi Britain’s special forces dang Iraq aser Syria na nung ISIS jihadis anema apusotsü tuyuba sülenbo SAS ano timba yoktsü.
SAS force jagi mission balala aika inyaktsü, saka parnok tongtibangtiba mapaji British nunger IS tem tepsettsü.
UK-i nisung 20 tepsettsü renemba tarensenji jungkai adoka memetetdaktsü, saka tenüng 20 rongnung Kent nungi Jones densema lir ama bilemer. Jones ya Islam tamangba yimsü dangi meyip aser lai Sakinah Hussain tenüng amshidar aser lai Khristan tem tekolak tangzüktsü azüngashiogo.
Kasa tarensen nung Britian nunger 10 alitsü südi ta bilemer, aser item rongnung Britian nunger adianu arishi küm 20 Nasser aser Aseel Muthana (17)-na densema alitsü südi.