UK-i parnok ‘N-weapons’ nung temulung lemteter

London, January 22 (Agencies) : Britain Ministry of Defence-i, “Osangbenertemi onoki nuclear tendangba nung takok mangu ta shiaka onoki linük indang ‘N-weapon’ tem nung temulung lemteta lir,” ta ashi.
Yaküm June ita nung Florida tzüküm anasa tzü telung nung jajaba rong, HMS Vengeance nungi shitakba nuclear meinoki akhaba Trident missile nükjidong metongi tangaleni ao, ta osangkakettem nung ashiba TV osangtem nung metetdaktsü.
Osangkaket ka nung ashiba agi, Trident atema vote agiteptsü hopta aika lia ibai atalok.
Yaküm July nung MP temi Trident renew asütsü atema vote agitepdang temulunger vote 472 liasü saka memulunger vote 117 ang ngutet. Iba mapang parnoki tzü telung nung jajaba rong pezü melentsü lemtet aser ibaji atema sen billion pound 31 ($38 billion) lateta yutsü.
Vengeance ya tzü telung nung jajaba Vanguard-class rong pezü rongnung ka lir aser iba rong yanglushiba sülen 2015 December ita nungi tzü telungi ia tendanger. Yanglushiba sülen missile tasen khatettsüsa oset peria lir aser computer inyakyima tuluba kümogo.
Iba missile tendangdang nükjidong metongtetbaji kanga miimshia ayur, ajisüaka navy nung inyaker tejen kati, iba missile ji tzü ajanga tuogoba sülen mopung nung junga mejajateti aküm, ta ashi.
Trident II D5 missile ji mile 5,600 pilar aliba Africa tzüküm ka tashi khaloktsütsü nükjidong liasü.
Trident system ya 1980s mapang Margaret Thatcher linük Ato Kilonser alidang, 1960s mapang nungi aliba Polaris missile system melena yangerba lir, ta kasa osang ajangasa ashi.
Trident ya 1990s mapang nungi amshia aru. Trident atema nüngdakba oset asem lir — tzü telung nung jajaba rong, missile aser warheads. Item oset ya küm aii amshitettsü ajisüaka kodanga meraksatsü tabo meshitettsü.
Tang aliba tzü telung nung jajaba rong pezüji 2020 tashi ka nungi mapa meinyaki akümtsü akok.