UK MP 16 London Marathon nung asemtsü

London, April 12 (Agencies): Taoba mapangtem nung MP temi shilem agiba otsü ajak raksaja, taküm London Marathon nung British Parliament nungi züngsem 16 asemtsü, ta sentong ayongertemi Bodhbarnü metetdaktsüogo.
2014 küm MP parnok 9-i shilem agia liasü aser iba ya tang tashi nung timteba lir, ta sentong ayongertemi lemsatepba osang ka nung shia lir.
Parnok 16 rongnung tetsür asem densema lir. Maneni Scottish National Party nungi MP, Hannah Bardell dena iba Marathon nung asemtsü. La ya SNP züngsemtem rongnungi mezüngbuba asemteper alitsü aser ibajia otsü tasen ka lir.
1981 nungi tenzüka London Marathon nung MP 70-i shilem agiogo.
Conservative Party nungi parnok 9 aser Labour Party nungi parnok 5-i iba Marathon nung asemtsü. Labour Party nung asemtsü alisang arishi küm 70 tain Kevin Barron ya ajak dang nungi tambusang asütsü. Ajidang masü pa ya MP asemer rongnung mezüngbuba ‘Knight Hood’ angusang lir. Liberal Democrats telok nungi asemteper ka danga züngsema mali.
MP rongnung tekeratiba asemba record Matthew Parris-i bena lir. Pa London Marathon nung 5ben shilem agiba nung pai alizüng atongba mapang ajak pa sülen alisang Doug Henderson dang nungi tekeraba lir.