UK nung ‘Hinglish’ course ajungkettsü inyaker

London, Metsüremi 10 (Agencies) : Taoba küm UK nung college kati ‘Hinglish’ oshi angazükdaktsütsü asoshi course ka agiogo aser kaketshirtemi iba oshi angazüktsü jangraba reprangteta taküm nungbo iba dangji tuluba akatsü sentong renema lir.
‘Hinglish’ oshi ya Hindi aser English na ka küma lokteper sayur. Portsmouth College ajanga ashiba agi, India nungeri lapokba company-tem nung mapa bushia inyaktsü jangrar kaketshirtemi iba oshi angazüktsü tejangraba lir kechiaser tongmelang dang asüyonga Hindi oshi angazükbaji ajanga parnoki wadang tajungba inyaka otettsü.
Yaküm tenzükba courseji taoba hopta nung tembangogo aser kaketshirtemi dang masü saka nisung taintemia taruba küm iba course agitsü atema asüngdangogo, ta college nung E6 Programmes tekolakba, James Watters-i metetdaktsü.
2017 November ita nungi teshimtet kaketshir telok ka nem iba course mezüngbuba agütsütsü tenzük aser UK nung dang masü alima linük balala nung Hinglish oshi ya koma business aser lokti nung amshir iba indangji parnok nem bushidaktsü.