UK nung kotari agi tebur ka yirutsü

London, December 07 (Agencies): London anüdoklen aliba metro station nung nisung kati tebur ka dak kotari agi arang aser pai ‘ibaji Syria asoshi’ ta ayimoktsüba ajanga police temi ibai kiralongra mapa lir ta ashi.

Police temi iba talokba ajanga linük nüburtem temulung ila makümtsüla ta ashi.

Honibar aonung central London nungi kilometer 10 pilar aliba Leytonstone Underground station nung ticket ayokba tesem anasa azü aliba aser kotari amsang police den asatepba twitter ajanga lemsatepba video ka nung kanga jangja lir.

Police-i, iba nisung ya arishi küm 29 asütsü südi aser pai kotari agi tebur kadakji meyirutsü tsüngda tangara amokmerena liasü, ta ashi.

Pai kotari agi yirutsüsang arishi küm 56 tain, tamburji tangbo junga lir. Pa den ano nisung ana kasa nisungi terara yirutsür lir, ta police-i ashi.

“Onoki iba ya kiralongra mapa ta züngshir,” ta London metropolitan police nungi kiralongrar anema raraba maparen nung lenir, Richard Walton-i ashi.

Police-i ‘Taser’ ka kahlokja iba nisung pua aruogo. Taser kahloktsüba ajanga nisung dak khen atema electric shock agütsür aser iba mapang police-i melamela oa pushir.

Iba nisung jagi, ni ya Western linüktemi Syria nung aliba Islamist telungpur anüng nungi amakba manga ayangerba lir ta ayimten, ta tenük kuli angur kati osangbenertem dang ashi. Ajisüaka police-i iba osang nung kecha majem.

Britain Parliament-i temelaba agütsüba sülen Brihostibarnü mezüngsüa parnoki Syria nung anüng nungi amaktsü tenzük.

Sorkar nung minister tejen, Iain Duncan Smith-i, “Tang Leytonstone nung atalokba lendong ajanga lemteta aliba kecha meraksatsüla. Iba amala kiralongrar nem asen teinyaktsütem amokbanga meyudaktsütsüla,” ta BBC dang ashi.

“Asenoki pei bilemba sadema lemsatepa, Khristmas mapang arendaka meli kibong aser tanurtem kima yimtong nung sadema anir jajaba ajanga parnok tebilemba raksatsütsü. Kecha tashi agia asen tebilemba aser teinyaktsütem mokokdaktsütsüla,” ta pai ashi.