UK nung PM Modi-i Ambedkar kürakyanglu & memorial lapoktsüogo

London, November 14 (Agencies): Ato kilonseri anogo asemnü UK semdangba tatembanglen kati arudang aser kiralongrartemi France yimtiba, Paris amakba lendong nung nisung jenti sür mangyim tia nung aliba mapang ka nung Honibar nü London nung Modi-i Dr BR Ambedkar indang kürakyanglu lapoktsüba den külemi naro tokja asür nem akhüm agütsüogo.
India Temzüng tebudi, Ambedkar London nung 1921 nungi 1922 küm tashi London School of Economics nung zünga liasü. Iba building ji King Henry’s Road nung lir. Pa indang memorial takdang trok nungji exhibition ka aser Ambedkar-i amshiba menden (chair) ka densema lir.
Iba memorial lapoktsüba mapang Modi den Maharashtra Chief Minister, Devendra Fadnavis-a densema liasü.
Hokolbar aonung kiralongrartemi France yimtiba, Paris tesem asem bomb aser prangpong amshia amakba lendong ajanga Honibar anogo ya tamang anogo ka liasü aser iba dak sentakba nung Modi-i, “iba ya meimchir anema inyakba lir aser kü mulung züreper,” ta ashi.
“Paris nung tatalokba ajanga kü mulungjang züreper. Item ama tatalokbatem anema longjemer raratsüla,” ta Modi-i ashi.
Yasüng Paris amakba yimya ya, 2008 küm Pakistani Islamic kiralongrartemi Mumbai nung Taj Hotel amakba den kasa lir.