UK nungi Nirav Modi, India-i anir arutsü atema inyakdar: ED

New Delhi, March 09 (Agencies): PNB ochimashi ken o nung tai tonglokja alisang, Nirav Modi anema ken o benoktsü aser India-i anir arutsü atema mepishiba nung ajemdaker British Home Secretary-i court ka nem ken o agutsüogo, ta tanü Enforcement Directorate (ED)-i metetdaktsü.
“Nirav Modi, India-i anir arutsü atema yaküm July ita nung UK nem temepishiba aguja liasü. Iba temepishibaji Westminster Magistrate Court nem agutsüogo ta UK Central Authority of Home Office-i metetdaktsüogo,” ta ED-i sangdong ka nung ashi.
ED-isa, Modi India-i anir arutsü atema UK-i shisadangdar; Pa anir arutsü atema sorkari mera ajak agia inyakdar, ta metetdaktsü.
Tanü British nunger osangkaket ka ajanga, tang Nirav Modi London West End nung pound sen million 8 jenjang ki ka nung lidar, aser diamond shishilembaba nung ajemokogo, ta sangdonga liasü.
Enforcement Directorate (ED) osang ajanga ashiba agi, UK Home Secretary, Sajid Javid-i anogo ana tejaklen London court ka nung iba ken o agutsüba osang parnok nem metetdaktsüogo.
Kobi melii ED aser Central Bureau of Investigation (CBI) nungi teshimtet telok ka UK-i aotsü, aser parnoki lawyer tem nem Nirav Modi anema kulitem metetdaktsütsü.
Arishi küm 48, Modi ya landmark Centre Point tower block nung lidar aser ita shia ki para pound 17,000 shi agutsür.
Hokolbarnü ketdangsertemi Maharashtra nung Raigad district kübok Kihim beach nung Nirav Modi’er ki poksaja liasü. Coastal regulation rules nung ajemdaker par ki poksatsü.
Osang angazükba agi, Department for Work & Pensions-i Nirav Modi nem National insurance number ka agutsüogo; iba tetezü pai Britian nung mapa inyaka litettsü.