Ukhrul nung lenmang teyangludak nokdang

Imphal, April 28 (Agencies): Manipur nung Ukhrul district kübok Poi nung lokti tentettemi tang teyangludak gari lenmang nung contractor-i construction inyakyim alema inyaker ta aija gari lenmang yangluba nokdangogo.
Iba lenmangji kanga mejungi yangluba video ka yasüng nungi prokshidar. Video nungji ‘black top’ yokba sülen ‘black top’ apo-apoa yokbaji kakteta adoker aser ongken adokba sayur.
Iba video ji ajanga ‘base course layer’ maliba, ‘subgrade layer’ memerükba aser ‘surface layer’ ji inch kata majungba jungkai adoka sayur.
Poi councilor, AS Themreishang-i ibaji ashishia ADC aser contractor den senden ka ayongogo.
Ajisüaka Dungrei junction, Ukhrul nungi Talui ajanga Tadubi tashi yangluba lenmangbo nisung aikati social media nung junga agizükogo.
Iba tesem nung alirtemi aiben akhangba sülen 2015 küm kilometre 115 talang lenmang yanglutsüji agizük, aser Road, Transport & Highways Ministry kübok NH and Infrastructure Development Corporation-i sen crore 1600 intoka yanglu.