UK:Kiralongrar mita aoba mapang nisung 4 apu

London, April 28 (Agencies) : London aser Kent, England tesem nung kiralongrartem mita aoba mapang nisung pezü apu aser ka yirutsü, ta Hokolbarnü Metropolitan Police-i metetdaktsü.
Ketdangsertemi, Brihostibar aonung mita aoba mapa ya taoba mapang Westminster nung nisung kati pa yangkhu nung kotari aika bena lia apuba den sendaktepa mali, ta osangbenertem dang ashi.
Iba mita aoba mapang Harlesden Road, Willesden, northwest London nung ki kati aidang arishi küm 20 shi tain tetsür ka police indang injang agi yirutsü.
Iba tetsür indang tenüng mesüra la kechi nungi, itemji memetetdaktsü saka la mozü ki ka nung anir oa yaridar. La kanga mejungi yiru ajisüaka taküm samatsüsabo masü, ta police-i ashi.
Willesden nung tebur ana, ka arishi küm 20 aser ka arishi küm 16 tain, na den tetsür arishi küm 20 tain ka dena apu. Ano Kent nung arishi küm 43 tain ka apu.
Scotland Yard-i ashiba agi, parnok ajak ya kiralongra mapa inyaktsü tenyaba aser sentong yangluba dak sendakba nung temulung melemi bilemba nisungtem lir.
Brihostibarnü pua alisang, arishi küm 27 tain tebur kaji kiralongra mapa inyaker nisung ta temulung melemi bilema apu. Pa ket nung lendong agütsüba osettem lir ta temulung melemi bilemer aser pa dang tashi mechioki yua lir.