Ukraine-i Independence Day anogomong among

Kiev, August 24 (Agencies): Ukraine linüki par Independence Day anogomong sentong tanü, Bodbar nü mongogo.
“Asen linük kümzüka ayutsü maparen nung asen linüki bendang linüktem dak masü saka asensasa asen tashi dak ajemdaker nokdaktsüla,” ta Ukraine Tir, Petro Poroshenko-i tanü sentong nung metetdaktsü.
Par mitkar tashi sayutsü nükjidong nung Ukraine mitkar, navy aser airforce teloktemi par tongpang nung amshitsü osettsüset sayua tanü sentong nung shilem agiba osang jangjaogo.
Russia linüki Ukraine ket nungi Crimea peninsula tashiyim agi 2014 küm agiba sülen par linük ana tsüngda tesendaktep mejungi akümba den külemi, Ukraine sorkar aser Russia-i pusema nungitba Ukraine sorkar anemertem na tsüngda tongpang kanga sashia rara aruogo.
Germany aser France linük nati yaria, Belarus kübok Minsk yimti nung yimjung tezüngzüktep ka yaküm, 2015 küm February ita agiba sülen Ukraine sorkar aser sorkar anemer na tsüngda tensa tajungba aküm saka Crimea den sentakba ken o nung Russia aser Ukraine na tsüngda tensa mejungi akümtsü tenzükshia lir.
“Tanü asen mitkar tashi sayuba sülen asen linüki asensasa asen linük kümzüktettsü saka maneni teyari nungdaker ta asen linük pusema yarir alima linüktemi angatettsü,” ta Poroshenko-i ashi.
“Asen linük kümzüka ayutsü asoshi aseni asen mitkar dak mezüngsüa metaloktsüsa akümer,” ta shia, par linüki Russia, US aser Britain linüktem den 1994 küm agiba tezüngzüktep indang jembia Poroshenoki sangoktsü.
Iba mapang Ukraine linüki Soviet mapang yanglua bendenba tongpang nung amshitsü nuclear osettsüset agientsü melena par linük kümzüka ayutsü nangzüktepa liasü.
Ukraine linük nung ochimashi inyakbaren agiendaktsütsü nükjidong nung par linük pusemer West linüktemi Ukraine sorkar nem teyari sen billion jenti agütsüogo saka par linüki aginüba ama, tongpang nung amshitsü osettsüsetbo agüja yariba osang bushiteta mali.