Ukraine-i Russia den tensa tamajungba mekümdaktsütsü ajungshir: Biden

Washington, August 13 (Agencies): Ukraine-i Russia den ajurushia aliba tensa tang dang nungi tamajungba mekümdaktsütsü tajungshiba olen ka US Tatong Tir, Joe Biden-i Ukraine Tir, Petro Poroshenko dang metetdaktsüogo.
“Russia dena kasa tajungshiba olen lemsatepogo,” ta shia, Biden-i telephone ajanga yashi, Hokolbar nü jembidang Poroshenko den tajungshiba olenji lemsatepa liasü.
Biden-i Poroshenko aser Russia Tir, Vladimir Putin na ajungshiba sülen par linük ana tsüngda adokba mangatettepbaren bentsütsü asoshi yimtenren aser yimjung senden amentsü lenmang bushitsü mulungba  olen ka lenir anaprongi metetdaktsüba osang jangjaogo.
Crimea nung tentetba tongti ki o jen raksatsütsü nükjidong nung Ukraine mitkar intelligence teloki par ketdangsertem Crimea-i miima yokba osang ka Putin-i tan Bodbar nü sangokja liasü.
“Russia-i par mitkar tashi amshitsü tatemtsü bushia, ozü Ukraine aitsütsü tenzükogo,” ta shia, Poroshenko-ia Crimea arrtsülen tenzükba Ukraine mitkartemi tongpang raratsü renemshia alitsü tetuyuba ka tan Brehostibar nü agütsüba osang jangjaogo.
Ano külen, Biden-i tan August ita 24 nü Turkey semdanga par linük ana tsüngda adokba mangatettepbaren bentettsü renemba osang ka White House-i metetdaktsüogo.