Ukraine keno nung West-i Russia maneni ajungshitsüla: Stoltenberg

Brussels, December 07 (Agencies): Ukraine aser Ukraine sorkar anemer na tsüngda agiba yimjung tezüngzüktep mapa küma inyaktsüsa Russia-i iba tezüngzüktep magizük tashi West linüktemi par linük maneni ajungshitsü tayongzükba olen ka North Atlantic Treaty Organization (NATO) Secretary General, Jens Stoltenberg-i tanü, Bodbar nü metetdaktsüogo.
Stoltenberg-i NATO aser Ukraine foreign minister-tem den teloktep senden ka amenba sülen osangbener den ajurutepdang iba olenji tanü sangoktsü.
“Tesüiba mapang Soviet Republic kübok densemba Ukraine anüdoklen yimjung tezüngzüktep anema kanga sashia inyakba kuli bushiteta lir. Ukraine sorkar aser sorkar anemertemi Belarus kübok Minsk nung agiba yimjung tezüngzüktepi memela aka, Ukraine anüdoklen anogoshia bomb kanga sashia pokdakja lendong atalokdaktsüba kuli tejangja ngua lir,” ta pai ashi.
“Russia-i Ukraine telok anati agiba Minsk tezüngzüktep agizüka, Ukraine talisa, par linük anüdoklen tensa tajungba kümdaktsütsü maparen meinyak tashi alima linüktemi Russia anema benokba tenokdangba sentongtem magientsü aser par linüki Minsk tezüngzüktep agizüktsü atema tanen makai ajungshitsü ayongzüker,” ta Stoltenberg-i nenshia ashi.
2014 küm April ita nungi tenzüka, Ukraine sorkar aser Russia-i pusema nungitba Ukraine sorkar anemertem na tsüngda Ukraine anüdoklen tongpang kanga sashia raraba ajanga tanü tashi nung nisung 9,600 dak tema asüba osang bushiteta lir.
Ukraine nung mangatettep adoka alir telok ana tsüngda tangatettep kati arua, par linük tensa jungdakja, yimji yimjung lidaktsütsü nükjidong nung Russia, Ukraine, France aser Germany nungi foreign minister-temi teloktep senden ka taoba hopta amen saka par senden tamakok nung tembanga liasü.
“Tongpang raraba ajanga masü saka yimjung atema jembitepba ajanga dang Ukraine den sentakba mangatettep ken o benteta, Ukraine nung yimji yimjung tia bener arutsütettsü,” ta Stoltenberg-i shisem.
Russia arrtsülen, Ukraine anüdoklen alirtem nem temeten balaka agüja, election agia parnoki aginüba lenirtem shimtsü aser sorkar anemer nem taidok agütsür iba tesem Ukraine yimli küboksa aitdaktsütsü nükjidong nung Ukraine lenirtemi sorkar anemertem den Minsk yimjung tezüngzüktep agi saka tanü tashi iba alizüngji asangsang nung majangzükteti lir.
European Union (EU)-ia Ukraine keno nung ajemdaker Russia anema tenokdangba sentong benoka lir.
Russia-i par mitkar tashi amshia, Ukraine ket nungi Crimea peninsula tashiyim agi 2014 küm agiba sülen Russia aser NATO na tsüngda tesendaktep mejungi akümtsü tenzüka lir.
Russia den angatetteptsü nükjidong nung NATO-i teloktep senden ka amentsü atema Russia ayonga lir saka Russia-i tanü tashi iba onükji magizüki lir.