Ukraine nung martial law benoktsü meranger

Kiev, Yimpoksüi/November 26 (Agencies): Russia nunger servicemen temi Crimea anasa Ukraine nunger rong asem dak akhaba sülen servicemen trok tashi yirutsü aser ita ka peyong navy tem mangatettep adoka arua aliba tensa tamajungba kümogo.
Tir Petro Poroshenko-i, linük nung anogo 60 atema martial law benoktsü asoshi agizüka ayutsü atema Verkhovna Rada; Ukraine parliament lower house jungdak senden ka akatsü tetuyuba agütsüogo.
Pai ashiba agi, iba jenjang ya Russia den raratsü sangdongtsü atema agiba masü.
“Ukrain shinga dena raratsü sentong mali,’ ta pai National Security & Defense Council dang Tentonü ashi.
Poroshenko-isa, Ukraine-i Minsk Agreements, peace deals sülen anidaktsü aser koba par sorkar, Russia aser southeastern Ukraine nung pro-Russian separatists tem tsüngda yanglua liasü, ta ashi. Iba tezüngzüktepba ya rara anendaktsü asoshi yanglu, kong 2014 nungi tenzüker nisung 10,000 dak tema süogo.
2014 küm Tsüklai/February nung anülulen linüktem busemertemi longkak aita Russia busemba tir Viktor Yanukovych atsüngdokba sülen iba rara tenzük. Iba masüdang linük yimtiba Kiev nung ita ka shi mangatettep tulu adoka liasü.
Martial law benokba sülen lokti senden ajak nokdangtsü, media inyaksangshi tajemba kümdaktsütsü aser Ukraine nunger o bendangertem senzü senpong mesademi kümdaktsüba den election kecha magitsü.
Poroshenko shiba indang approval ratings shilem 10 dak tekübok lir, pa Metsüremi/March 31 nü Poroshenko election agitsü aliba nung tanaben iba menden abentsü meranger ta aikati bilemer.
Pai aniba sorkar tang sentsü agi tsübanga lir aser Western loans dak metaloker alir.
“Russia anema sanction tasen benoktsü nüngdaker,” ta European Union dangi Ukraine ambassador Mykola Tochitsky-i Tentonü tweet asü.
“Asenoki Ukraine anema Kremlin rara anendaktsütsüla.”
Russia nunger special forces temi Amungnü Kerch Strait anasa Ukraine cutters ana aser tugboat ka dak akhaba sülen pua yua lir.