Ukraine nung tai maketba nübur 105 shi May-Aug nung asü:UN

Geneva, September 08 (Agencies): Tensa kanga mejungi aliba Ukraine linük nung sorkar o sorkar anemer na tsüngda tongpang raraba ajanga tai maketba nübur 105 shi taküm May ita nungi August ita tsüngda asüba osang bushitetogo ta United Nations (UN)-i tanü Mongolbar nü metetdaktsüogo.

“Tan bushitetba nisung asüba osangji taküm May ita jakdang ita 3 nung nisung asüba osang den asemben agi timba akümba bushiteter lir,” ta UN High Commissioner for Human Rights lenisang, Zeid Raad al-Hussein-i metetdaktsü.

Paisa ashiba agi, 2014 küm April ita nungi tenzüka Ukraine sorkar aser Russia pusemba sorkar anemer na tsüngda tongpang raraba ajanga tongpang rarar aser nübur naprongla densema ishiba agi nisung 7,962 asüba aser nisung 17,811 shi yiruba osang tang tashi nung jangjaogo.

West-i ayongba sülen Ukraine sorkar aser sorkar anemer nati yimjung tezüngzüktep ka taküm February ita agi saka telok anapronglai iba tezüngzüktep anema inyaka maneni tongpang mapang shia raraba osang bushiteta lir.