ULB aser Art 371(A) indang temetettsütem lemsatep

Justice H.K Sema-i State Law Commission tentettsü shidang

Kohima, May 20 (TYO): Linük Temzüng nung lateta aliba junga memetetba aser yimsüsürtem o nübortem tsüngda amalitep maliba ajanga Linük Temzüng nung Arrla 371(A) tim mesüi amshir aser mashileni meyipsar, ta Supreme Court Judge (Retd), Justice H.K Sema-i ashi.
Honibarnü Capital Convention Centre, Kohima nung Ex-Parliamentarians Association of Nagaland (Ex-PAN)-i ayongzükba Workshop on Urban Local Bodies (ULB) vis-à-vis Article 371 (A) nung o jembidang Justice H.K Sema-i, “mashileni meyipsaba aser amalitep maliba ajanga state nung terata tulu adokdaktsüogo, anungji lennirtem aser ketdangsertemi teküpoktiba jenjang nung nübortem dang iba ya angatetdaktsütsüla” ta ashi.
Naga loktiliba nung ‘ism’ ya tsükchir tulutiba lir aser kin o kin tsüngda ‘ism’ maitdaktsütsüla. Tetsür nem shilem lemzüktsüba ozüngji State Legislative Assembly-i yangluba lir aser iba nung linük temzüngren nungi teuyuba mali, ta paisa shisem.
Teburtemi amokbanger aliba loktiliba ka nung tebur aser tetsür kasa jenjang nung melitettsü. Ozüng balaka yanglu nungdang tetsür o tebur jenjang kasa akümtsü aser iba atemaji tetsür nem shilem lemzüktsüba ya sabang ka lir. Iba tebilemtsü atema Nagaland nung State Law Commission ka tentet nung junger, ta Justice H.K Sema-isa metetdaktsü.
“Urban Local Bodies ya ozüng ajanga tentetba lir aser ULB temji state sorkar indang shilem ka ama inyaktsüla. Arrla 371(A) nung state asoshi temeten balaka agüja lir, ajisüaka iba Arrla yagi State sorkar nem agüja aliba tashi amshiba nung tetsükdaktsü bener marutsütsüla,” ta High Court nung Retired Judge, Justice Zelre Angami-i ashi.
Arrla 371(A) ji Linük Temzüng (13th Amendment) ajanga Linük Temzüng nung enokba lir aser temeten balaka agüja alibatemji Parliament ajanga yangluba lir aser iba ya State sorkari pei tashi kübok yangluba ozüng nung mamshitettsü. Nagaland Municipal Act (NMA) ji state ozüng ka lir aser iba Act nung Arrla 371(A) mamshitettsü, ta Justice Zelre-isa shisem.
Iba sentong nung tongti tesemdangerji Chief Minister Dr. Shürhozelie Liezietsü liasü aser pai o jembidang, “taküm February ita state sorkari ULB elections lemtetbaji, Linük Temzüng nung Arrla 371(A) kümzüka ayutsü atema liasü, kechiyong iba ya state aser nübortem atema kanga tongtipang lir” ta ashi.
ULB nung tetsür nem shilem lemzüktsüba ajanga Naga nunger sobaliba inyakyim nung kongshitsü ta nisung aikati bilema election anema nokdak. Ajisüaka, sorkari bilembabo, Linük Temzüng nung lateta aliba ama tetsür nem shilem lemzükja ULB election magira, Supreme Court-i Arrla 371(A) alema oshidang agütsütsü akok aser ibaji ajanga Naga nunger atema tetsükdaktsü bener arutsütsü, ta Dr. Shürhozelie -i ashi.
Iba tebilemtsü atema olemtep aser shisa lemsatep tajung akatsüla aser aji asü nungdang asenoki tarutsü nung aibelen masütsü, ta Chief Minister-isa shisem.
Iba sentong nung mendenji Ex-PAN general secretary Medokul Sophie liasü, State Chaplain Rev. Kuzierang Thou-i temoatsü meshia sarasadem, Ex-PAN President T. Khongo-i tesentepertem pela agizük aser Dr. Chumben Murry-i anküp tepela o jembi.