ULB election anema Nagaland ajunga nung mokdangba sentong tiptema agiogo

Kohima, January 28 (TYO): State sorkari February 1 nü Urban Local Bodies (ULBs) indang elections methitemi agitsü lemtetba anema Honibar nungi Nagaland ajunga mokdangba sentong tenzükogo.
Tetsür nem shilem 33 lemzükja ULBs election agitsü ta sorkari lemtetba anema Joint Coordination Committee (JCC)-i mokdangtsü sentong ayongzük aser district pungu nung pei pei kin Hohotemi ketdangsüa mapang balala nung mokdangogo. Ajisüaka, tanü mokdangba mapang lendong atalokba mesüra mangatettep adokba osang kecha maliasü aser tesem ajak nung tiptema agiogo.
Dimapur nung JCC-i ghonda 12 mokdangtsü ayongzüka liasü aser jila kübok tongtibang tesemtem nung nübotem lemzükja mokdangba sentong takok ngua agi.
Tanep 11:00 ako nungi Dimapur Government College nung Municipal election atema polling ketdangsertem training shilem tasembubua agitsü liasü saka JCC kübok nübotemi DGC-i aoba gari lenmang nokdanger nisung shinga meyok.
Dimapur nung tanü gari aser nisungtem mesenzü aser külen government office, bank, school, college tem den shishilembadak ajak shibang.
Kohima nunga Angami Youth Organisation (AYO)-i anir federating units aser colony o ward balala nungi nübotemi tanep 9:00 ako nungi nikongdang 4:00 tashi mokdanga liasü.
Mokdangba mapang garitem mesenzü saka kiyimba benjung nung adener aser Arogo dak sendakba sentongtem nung adenertembo tenokdangba maliasü. Maneni Kohima nung ainlen senzürtem aser senzüsenbongertem shinga menokdang.
AYO-isa sangdong ka nung, “Tanga tetuyuba ka magütsü tashi Kohima Municipal Council, Medziphema Town Council aser Chumukedima Town Council nung mokdangba sentong malitsü” ta metetdaktsüogo.
Dimapur Municipal Council aser East Dimapur Town Council nung tensa ajanga Medziphema Town Council aser Chumukedima Town Council nung mokdangba ayongzüktsü akok, ta AYO-isa sangdong nung shia lir.
State sorkari Municipal aser Town Council (ULB) election agitsüba dak sentakba maparen anema tejashiba sayua Honibarnü Ao Sendenia Ao litsü ajak nung anepdang 8:00 ako nungi nikongdang 4:00 tashi mokdang sentong ayonga takok ngua aser tipdema agiogo.
Municipal election dak sentakba nung Ao Senden rongdak nüngdak ka adokba den repsema nübur tera anisüngzüktsü mechi Jan 30 (Hombar) nü atema mokdang sentong thinena atar, ta Ao Senden ketdangsürtemi metetdaktsüogo.
Nagaland Municipal Act nung Naga nunger sobaliba dak mapetba onük kechisa lir, itemji nüburi mulungba ama meyanglushi tashi taoba mapang Ao Sendeni telemtetba koba agia lir, iba nungi matsüngshii noktaka lir, ta Ao Senden ketdangsürtemisa nenshia metetdaktsü.
Kiphire nunga mokdangba sentong takok ngua aser tiptema agiogo ta osang ka ajanga metetdaktsü.
Naga nunger kin hohotemi ayongzükba tashi angaa Kiphire nung NPF, BJP, Congress aser Independent candidate temi elections nung metokteptsü atema tenangzükba agiogo, ta angazüker saka Kiphire JCC-i February 1 tashi anüktsü ta osang metetdaktsü.
Wokha district nunga Lotha Hoho-i public rally ka ayongzüka agi aser iba nung parnoki ULB elections nung shilem magitsü telemtetba akangshia liasü.
Zunheboto aser Phek district nungi mokdangba sentong tiptema agiogo ta police ketdangsertemi ashi.
Zunheboto Town Youth Organization (ZTYO)-i sangdong ka ajanga Deobar tekülem sentep agiba sülen Deobar (January 29) anüngdang 12:00 ako nungi dokan ajak lapoktsü mepishia metetdaktsüogo.
Hombar nungi anepdang 8:00 ako njungi nikongdang 4:00 tashi maneni mokdangtsü ta ZTYO-isa sangdong nung shia lir.
Longleng aser Tuensang district tem nungbo mokdangba sentong maliasü saka kin hohotemi JCC pusema nungiter ta metetdaktsüogo aser külen Phom Peoples’ Council-i January 31 aser February 1 anogotem Longleng nung polling mesüdaktsütsü atema mokdangba sentong alitsü ta metetdaktsü.
Iba osang zülu tashi nung state Chief Minister’er district Peren aser Mon nungi mokdangba sentong indang osang metetpelatsü mekoki liasü.