ULB election magiba ajanga senotsü teyari mangur: Advisor Zhaleo

Dimapur, Monupii/May 05 (TYO): Urban Development Directorate, Kohima nung aliba Conference Hall nung May 5, 2023 nü SBM-U2.0 coordination meeting cum training on CSAP and CSWAP plan implementation, strategies formulation, and mobilization of SBM Projects for 39 ULBs sentong ka Advisor, Urban Development and Municipal Affairs, Zhaleo Rio den agia liasü.

Iba senden nung jembidang, iba senden aser training sentong nung dentetba ya maongka tulu lir, kechiaser state nung Urban Local Bodies dak sendakba Administrator asoshi tongtipang senden ka lir, ta Advisor Zhaleo Rio-i ashi.

Pai iba senden nung aliba Administrator tem dang maongka ya agia yimya metettsü ayongzük, kechiaser department indang scheme balala parnoki ang mapa kuma inyaktsü, ta ashi.

Urban Local Bodies ketdangsüba aser anepaluba nung administrative officer temi akok tashi tajungtiba nung inyaktsü imlar, ta pai ashi.

Taoba mapang ULB 19 dang liasü saka tangbo 39 kumogo aser ministry nungi senotsü agütsüba ya taoba ULB 19 atema dang lir aser department ajanga itemji ULB 39 prong nem lemsatsür, ta pai ashi.

Sorkari ULBs nem facility aser nüngdakba ki-o-jen agütsütsü atema jembir, kechiaser ULB kar nung revenue bendener aser kar nung mebendener aser revenue bendenba nungi ULBs nung mapa inyaker nem itasen magütsütetba asoshi tezü atanger, ta ashi.

Zhaleo-i ULBs ajak nung staff kwi ali aji metetnüa ashi aser jila tuluba süaka nütsüng yongsük peria alidak revenue peria angur aser tajungba inyaktettsüla, anungji Administrator temi temolung agüja scheme balala mapa kuma inyaktsüla aser revenue tajungba bendena nüburtem nem facilities aser amenities tajungba agütsütsüla, ta Advisor Zhaleo-i ashi.

Administrator temi temolung agüja mapa inyakra department-i sen lemzüktsütsü, ta ashi.

Labor contract atema department-i lenmang bushiba mapang lir aser maneni jembishinütsü. Administrator temi local MLA tem den jembishinüa sentongtem yanglutsüla, ta pai ashi.

State nung UBL elections magitetba ajanga senotsü nung timtem lir, aser sorkari iba ken o nung temolung agütsür aser Naga nungeri amalitep akaba ajanga asenoki Municipal Act ya yanglushitsü aser election ya agitsüsa, saka ULB Administrator temi nüburtem asoshi maneni inyaktsüla, ta pai ashi.

Public Park tem yanglutsüba dak sendakba nung pai programme officer tem dang tesem jangjatsü ajungshi aser ali ya angati asütsüla aser ali ya tenla agütsüba süang, mesüra aliba süang, kuli kaket shidak alitsüla aser tarutsü nung mangatetep madoktsü mechi MoU alitsüla, ta ashi.

Iba senden tenzüka Elizabeth Ngully, Additional Secretary aser Mission Director, Swachh Bharat Mission Urban ajanga metetpela mapang agia liasü aser senden tatemlen SWM Methods and Technologies, UWM Methods and Technologies amala indang jembia liasü.