ULB election nung candidate 67-i tenüng agüja lir

Kohima, Jan 4 (TYO): Nagaland nung municipal aser town council election magidaktsütsü asoshi lokti tentet aikati nokdangaka, tanü Bodbar nü tashi nung tesem balala nung candidate ajak agi nisung 67-i nomination file süogo.
Itemji Independent candidate kar dak alaka teimbaka NPF candidate-tem lir.
Election department osang ajanga angazükba agi, yashi Phek Town Council nung candidate 13-i tenüng agütsüba den tanü Bodbar nü Mokokchung district nungia Tuli Town Council nung NPF candidate parnok 9-i tenüng agütsüogo.
Ano, Wokha district nunga Bhandari Town Council nung NPF candidate 8 den Independent kati nomination file süogo aser Wokha Town nunga nisung 13-i agütsüogo. Dimapur nunga East Dimapur Town Council nung candidate 10-i tenüng agütsüogo aser Phek district nungsa Meluri nung NPF candidates 9-i tenüng agütsüogo aser Chozuba nung NPF candidate 8 tenüng agütsüogo.
Angami Public Organisation, Ao Senden, Sumi Hoho, Chakhesang Public Organisation aser CNTC teloktemi election magitsü asoshi telemtetba agia lir.
Mon, Mokokchung aser Changtongya town nung nisung shinga nomination file mesüdaktsütsü asoshi ali kibur yimtentemi nokdangba osang angazüker.
Ano, Kohima nunga nisung shinga nomination file masütsü asoshi Angami Public Organisation (APO)-i ozüng agüja lir aser Kohima Municipal Council election nung inürtem ajak Brehostibar nikongdang 4:00 ako nung APO-i sendeni jaoka lir. Iba maparen nung tashi mangarbo Angami lima nungi küm ter aridoktsü lateta lir.
APO-isa Angami nunger yimtsüng shia dang pei yimer shinga iba election nung shilem magidaktsütsüla ta ajangajanga metetdakja lir.