ULB election nungi candidate 37-i pei tenüng agienogo, JCC ka shimtet; Naga Council-i Jan 15 tashi agütsür

Kohima, Jan 12 (TYO) : Nagaland nung Urban Local Bodies (ULB) election tokteptsü atema lokti tentettem balalai lemtetba anema tenüng agütsürtem rongnungi Brehostibar nü election agitsü alidak tesem balala tenet nungi candidate 37-i pei tenüng peisasa meyipa agiogo.
Tang tashi nung Kohima, Mokokchung, Tuensang, Mon, Medziphema, Changtongya town nungang nisung shingaia tenüng agüja mali aser tanüngba town council-tem nung tenüng agüja alirtem ajak agi 535 liasüba nungi tanü tashi parnok 37-i peisasa pei nüng meyipa agiogo.
ULB election ya February 1 nü alitsü aser iba atema tenüng agütsüba anogo January 9 nü tashi liasü aser anogo ananü parnok tenüngtemji temsüa ali mali reprangdanger külen tanü Brehostibar nü peisasa pei tenüng meyipa aginürtem atema mapang lapoktsüogo aser ibaji January 17 tashi aotsü.
State Election Commission osang ajanga metetdaktsüba agi, tanü peisasa pei tenüng meyipa agir candidate 37 rongnungji, Puftsero Town Council nungi 27, Phek Town Council nungi 4, Meluri Town Council nungi Independent ana, Chozuba Town Council nungi Independent ka liasü. Item town council pezüpronglaji Phek district kübok Chakhesang nungertem lir. Chakhesang Pubic Organization (CPO)-ia par district nung nisung shinga ULB election nung shilem magitsü asoshi metetdakja lir.
Ano, Kiphire district kübok Kiphire Town Council, Mon district kübok Tobu Town Council aser Dimapur Municipal nungia candidate kaka peisasa tenüng agienogo.
Parnok 37-i pei tenüng agienba sulen ano candidate 498 anünga lir, ajisüaka kin shia telongjemi pei lima nung ULB election nung shinga metokteptsüla ta akangakanga nokdaka alinungji, taruba anogo pezü pongoka tsüngda ano candidate aikati pei nüng agientsüa akok.
Nagaland nung lokti tentettemi ULB election magi atatsü shiaka mangai agitsü asoshi government-i sentong methitemi aoba ajanga, ibaji nokdangtsü asoshi tanü Brehostibar nü Dimapur nung kin pongoi akümba Joint Coordination Committee (JCC) ka shimtetogo. Iba JCC nung züngsemtemji Ao Senso Telongjem Dimapur (ASTD), Chakroma Public Organisation, Lotha Hoho Dimapur, Western Chakhesang Hoho aser Western Sumi Hoho nungertem lir.
Iba JCC lenitsü atema ASTD tir, Wb.Subu Jamir, Convenor, Western Chakhesang Hoho nung tir Vekhosayi Nyekha, Co-Convenor, Lotha Hoho nung memdenbuba yariba, Lichio Kithan, Co-Convenor, Western Sumi Hoho nung tir Co-Convenor, Zheshito Swu, Co-convenor, Kuda Unit, CPO nung tir, Luola-u Usou – Co- Convenor, Rainbo Ngullie aser Mughato Awomi o Mozen Aier na joint secretary shimtet.
Tanü parnoki osangbenertem den jembidang, senden nung ULB election dak aketba ken o ajak lemteper külen nübortemi ashi manga shirnokisa ULB election nung tokteptsü atema tenüng agüja lir, parnok ajaki pei tenüng meyipa agidaktsütsü lemtetogo ta metetdaktsü.
Iba telemtetba mapa ya takok ngua inyaktsü atema kin pungu nungi lanurtem dena Action Committee ka shimogo ta parnokisa metetdaktsü.
Tang Nagaland nung ULB election magidaktsütsü asoshi nübortemi akangba ola ya government-i angatsüla ta parnokisa metetdaktsü.
Ano, kasa onük nung Dimapur district kübok Dimapur Municipal, East Dimapur aser Chumukedima town council election nung aitsü atema shirnokisa tenüng agüja ali, parnok ajaki January 15, 2017 tashi nung pei tenüng meyipa agitsüla, aji mesüra sobaliba temzüngi melaba ama tapet temerenshi agütsütsü ta Naga Council-ia tanü sangdong ka ajanga metetdaktsüogo.