ULB nung tetsürtem

Nagaland nung Municipal aser Town Council  election tang tashi magitetba timtem ya, kaji municipal aser town council kübok alirtem dang pei li nung alir süaka alimelen agitsüba yimya aser ano kaji, tetsürtem nem menden asem shia ka shiteta yutsütsüba inyakyim anaji asütsü südi. Itemji Naga nunger sobaliba ozüng dak mapeter ta nübortemi nokdakba mapang Nagaland nung tesama aser takoksa tulu ajuruogo. Iba mapang atalokba bilemtettsüsa Kohima nungbo leper dena yanglua lir. Aji oda, Nagaland nunga ozüng yanglur yimsüsürtem dang nungibo nübortem tashi tuluba ta jangjatsüsa tatar senden nung Municipal ozüng latetba ajak amajok kümdaktsüogo. Iba jagi Nagaland nung municipal aser town council aliba tesemtem nung terenlok mapa meinyakteti akoksaba ajangshir, kechiyong center government-i ULB election agia municipal aser town council mekümtetba agi terenlok mapa inyaktsü atema sen meyoker, aser ano külen linük ajunga nung kasa ozüng amshia ULB election agir mapa shitak tenzüka aoer saka Nagaland nungbo mouteter ta asüba agi Supreme court-i Nagaland state government merenshidi asür. Ajisüaka, ano onsara benjaba agi, koba angar koba manga, Nagaland government-i Nagaland Municipal Act mali küma agiener, tang ya Municipal ozüng tasen ka latettsü atema tatar senden ayongzüka lir. Iba maparen nung tajung kaji, state government-i nübortem den meküptepi nübor tsütsü atsünga Municipal ozüng ya latettsü meranger. Ibayongji, tang yangludanga aliba Municipal ozüng nungjibo nübortemi maginüba alimelen saru malitsü aser Municipal aser Town Council nung tetsür mendenbula asütsü ta akhi ozüng nung lateta alibatema malitsü. Ajisüaka, mepaitoktetba kaji Municipal aser Town council nung menden asem shia ka, aji noklang nungbo shilem 33, balaka shiteta yutsütsüba ozüngji asütsü, kechiyong iba arlaji medeniang Municipal ozüng melatettettsü, kechiyong ibajibo alitsüla ta Supreme court-ia shia lir. Atangji, Nagaland nunga, akhi tsürabur mapang nungi shi agi alanga atsüngba putu menden dak alaka,  tanü putu nung tentetba yimten menden legislative assembly-a süang mesüra municipal aser town council-a süang tetsürtemi shilem magitettsüsa tenokdangba kecha maka, anungji election nung tokteptsü koka lir. Iba jagiang tangbo Nagaland Legislative Assembly nung tetsür ana mena lir. Ajisüaka, tetsürtem nem yimten nung menden balaka shiteta yutsütsüsa nüngdak akümbaji, tanü sobaliba aser election agiba yimya agi tebur den kasasa toktepa tetsürtem election nung tokteptsübaji mapa kanga tasak kümogo, iba jagi tetsürtem nem yimten nung maongka balaka agütsütsüsa akümer. Atangji, yimten nung tetsürtem nem menden balaka shiteta yutsüba agi tetsürtem jenjang ajungkettsüsa inyaktettsübaji tetsürtem dak keta lir. Tanüa asen lima election nung teburtem dang toktepaka, election nung sen alemtsü aser proxy vote ajentsü atemabo tetsürtemiang tejangraba inyaker. Item yimya tamajung aser ochimashi mapatemji toktsür, shitakba teburtem den toktepa nübortem asoshi mapa tajung inyaktsü tejangraba nung tetsürtemi yimten nung shilem agira, asen limaji manger sangwa nung junga kümer alitsü. Iba tangatetba aser teimla nung Nagatsürtemi aser talisa Aotsürtemi yimten nung shilem agitsü renemtsüla. Atangji, Nagaland-a state balaka aser labo ano linük temzüng nung arla balaka nung temeten aser maongka talila agüja lir, anungji inyakyim aika nung tanga state-tem den kasa mesütettsü. Ajisüaka, Urban maparen dak aketba Municipal aser Town Council ama yabo akhi sobaliba dak keta maliba ozüng aser inyakyim asünungji, center government-i state ajak nung Municipal ozüng ya kasa asütsüsa ozüng lateta lir. Ano metsütsüi tanü mapangba ya center government-i linük ka ozüng ka, linük ka election ka, linük ka Identity Card ka ta asütsü merangba putu lir. Iba jagi, ashiko,tang Nagaland nung Municipal ozüng tasenbajia, Naga nungertemi agizükyonga, center-ibo magizüktsüa akok.