ULBs election agitsü lemtet; JCC, AYO & CYO temi mokdangtsü

Dimapur, January 27 (TYO): Nagaland sorkari Municipal aser Town Councils Election anogo methitemi agitsü lemtetba anema Joint Coordination Committee (JCC)-i Janaury 28, 2017 anepdang 6:00 ako nungi nikongdang 6:00 ako tashi mokdangtsü ayongzükogo.
JCC-i municipal election anema masü saka election thinena atar kin Hoho tem den tamasa sobaliba temzüng-ozüng aser inyakyim nung aliba ama jembishinüba sülen ang election agitsü atema akhanger, ta sangdong ka nung metetdaktsü.
Mokdangba mapang dokan ajak shibangtsü aser gari o nisungtem senzüsenbongba nokdangtsü. Ajisüaka, district administration, police, para military, media personnel, hospitals, tatidang agütsür kaketshirtem, kiyimba/tasür asoshi senzürtembo tenokdangba kübok maiter, ta JCC-isa metetdaktsüogo.
Deobarnü (January 29) nü mokdangba agiena atatsü saka January 30 nungi February 1 tashi maneni mokdangtsü, ta parnokisa shisem.
Tanü JCC-i Tourist Lodge, Dimapur nung Municipal election atema candidate tem senden ka amen aser iba mapang DMC nungi candidate 22-i parnok tenüng meyipa agiogo, ta JCC-isa ashi.
Hokolbarnü cabinet-i Municipal elections mathitsü aser ozüng lateta aliba ama iba mapa tembanga inyaktsü ta telemtetba agi.
Elections tiptema agitsü atema sorkari district administration aser police tem dang mapa inyaktsü tetuyuba agütsüogo.
Ajisüaka, sorkar indang tangatetba metetdaktsütsü atema state sorkari Tribal Hoho aser tanga teloktem den ajurutepa olemteptsü mulunga lir, ta Commissioner and Secretary to Chief Minister-i sangdong ka nung metetdaktsü.
Ano külen, cabinet-i elections agitsü lemtetba nung sülen NPF-i party züngsem ajak dang party tetuyuba sülen anidaktsü aser elections takok ngua agitettsü atema mapa inyaktsü tetuyuba ka agütsüogo.
Kohima aser tanga Angami nunger lushitem nung Angami Youth Organisation (AYO)-i anepdang 9:00 ako nungi nikongdang 4:00 ako tashi mokdangtsü ta AYO sangdong ka nung metetdaktsüogo.
Sorkar aser JACWR-i Naga nunger ola magizükba anema lungkak aitba sentong nung senso ajaki amalitepa yaritepdaktsünür, ta AYO-isa sangdong nung mepishia metetdaktsü.
AYO-i mokdangba mapang agüja alirtembo tenokdangba kübok maiter- Hospitals, Pharmacies, medical visitations & duties, hotels, bakeries, state adena senzüsenbongertem (kuli atema ticket abentsüla), shisaliok rejutem ajak, kaketshirtem, kiyimba sentongtem (kangabo mesenzütsüla), Arogo dak sendakba sentongtem, press & media (maitsü abentsüla), osangkaket alemertem, petrol pumps, gas agencies & deliveries, KMC aser yimtsüng mesüra urban panchayats indang sanitation vehicles, aluyimertem, military & police (rara adoktsüsa tensa bener marutsü tuyur) aser district administration.
AYO-isa Government registered garitem kecha mesenzütsü metetdaktsüogo aser AYO nübo kar dak tashiyim mapa inyakra, iba tebilemtsü khuretji Nagaland sorkari abentsü ta sangdong nung shia lir.
Chakhesang Youth Front (CYF)-ia January 28, 2017 anepdang 9:00 ako nungi nikongdang 4:00 ako tashi Phek district nung Chakhesang lushi mokdangtsü ta metetdaktsüogo.
Sorkari ULB election agitsü lemtetba anema iba mokdangba sentong ayongzüker aser senso ajaki yariteptsü mepishir, ta CYO-isa ashi.
Mokdangba mapang hospitals, pharmacies, medical duties, wedding parties, police & para military forces, district administration aser press & media tembo tenokdangba kübok maiter, ta CYO-isa metetdaktsü.