ULBs election indang telemtetba meyipa agitsü mepishir

Dimapur, December 13 (TYO): Naga nunger kin hohotem aser tongti teloktemi state sorkar dang November 24, 2016 nü Urban Local Bodies (ULBs) indang elections agitsü atema state assembly-i telemtetba agiba meyipa agiang ta chief minister nem tezüluba ka agütsüogo.
Naga nunger tongti Tribal Hohos/Bodies-i Naga nunger den senden balala menyonga aruogo aser tesüsabuba agibaji October 31, 2017 nü Angami Public Organisation (APO) Hall, Kohima nung aser December 5, 2017 nü Kisama nung sendentem amenba lir. Senden ajak nung lisopurtemi ULBs indang election magitsü atema tebilembatem lemsatepa liasü aser iba nung ajemdaker state sorkar dang cabinet telemtetba agientsü mepishir, ta Angami Public Organisation president Dr. Vilhusa Seleyi aser Chakhesang Public Organisation president Kekhwengulo Lea nati shidi nung shia lir.
Yimjung aser jungtepba mongpu nung maneni Naga nungeri Nagaland Municipal Act jungjunga reprangshia meyanglu tashi Nagaland nung ULBs indang election dak sendakba telemtetba meyipa agitsü mepishir, ta tenatisa ashi.