ULFA-i amokmerenba sülen Hindi oshi jembirtem tsübuteper

Dibrugarh/Guwahati, July 19 (Agencies) : Myanmar nung jenoka aliba Ulfa (Independent) tanishir Paresh Baruah-i Assam nung Hindi oshi jembirtem amokmerenogo aser iba ya ajanga Assam nung Hindi jembirtem tsübuteper.
Anogo ana tejaklen parnoki mokdangba sentong ka ayongzüka agidang par telok anema yimyim ayimba nung ajemdaker Baruah-i iba osang metetdaktsü.
Hokolbarnü Baruah telephone ajanga TV sentong ka nung jembidang iba amokmerenba osang metetdaktsü.
Tinsukia district kübok Ulfa (Independent) telungpurtemi Hindi oshi jembir nisung ana tepsetba sülen anogo asem lir iba osang sangoktsü.
Tinsukia nung mokdangba sentong ka ayongzüka agidang All Assam Bhojpuri Parishad (AABP) aser tanga Bhojpuri teloktemi ‘Ulfa meyipa oang’ ta ayimtena lungkak ait.
“Hindi oshi jembirtem tetsübu tia ka nung lir. British nungeri ozü tetsüteboutem Assam nung mapa inyaktsü atema anir aru. Parnok nungi jakzükertem Assam nung liyonga arur aser Assam lokti den meyoptepogo. Tai maketba nisungtem tepsetba onoki anendaktsünür” ta All Assam Bhojpuri Parishad tir, Parshuram Dubey-i ashi.
“Tinsukia nung lungkak aitertemi osangkaket sangdong nung ajemdaker nisung tepsetba atema Ulfa aitsü. Onoki CBI nem bushisüngdang südaktsünür. Taoba mapang Dhemaji bomb lendong aser Sanjoy Ghose tepsetba tatalokbatem nung parnoki shilem magi ta Ulfa-i metetdaktsü. Nisungtem amokmerentsü melena, parnoki media aser sorkar dang tatok meshiang ta akhangtsüla, kechiyong parnoki Ulfa aitsü” ta Dubey-isa shisem.
“Sadiya aser Assam telunglen aliba Hindi oshi jembirtemtsübuteper. Parnoki lendong ajurutsü ana nung lir” ta Assam Bhojpuri Parishad tezüluer, Nandalal Koiri-ia metetdaktsü.
Baruah-i Hindi oshi jembirtem amokmerenbaji Purvottar Hindustani Yuva Samaj-ia aitsüogo.
Ulfa (Independent)-i Ulfa (Independent) oshi jembirtemji bendangertem aser Assam rongsen agirtem ta aitsür, ta Samaj otongdar Raman Jha-i ashi.
“Assam nung onoki densema lir. Ozü tetsütebou nungertem yangi liasü. Onoki Assamese sobaliba agizükogo aser Bihu dena benjunger. Onoki yimjung meimer aser mapa meranga inyaker. Assam renlokba nung Hindi oshi jembirtemi shilem agiba bilemtettsüla” ta Jha-isa metetdaktsü.