ULFA (I) asoshi timtem

Assam nung United Liberation Front of Asom (ULFA) telok ya ana lir, ULFA telok kabo temai adoker India government den yimjung asoshi jembir saka kabo Assam lima nüjiso asoshi rarar, anungji tang tashi parnok yabo telong nung lia inyaker. Ibayongji Independent bushir ULFA telok ULFA (I) ta jembir. Iba telok nung mendenbubaji Dr.Abhizeet Asom lir aser pai aniba telok nung sepai tanishisang Commander-in-Chief-ji Paresh Baruah lir. Mapang talangka Naional Investigation Agency (NIA)-temia ULFA(I) mendenbuba Dr. Abhizeet ya shibaar mejangjateti liasü, ajisüaka tangbo pa ya London nung mozü ki ka nung inyaker medical doctor ka tenüng agi Dr.Mukul Hazarika lir ta NIA ajanga jangjaogo. Pa ya Nagaon nungi aser ULFA purtem rongnung mendenbuba Arabinda Rakkhowai anir yimten telatetba ka agitsü atema India den yimjung nung ken o lemteptsü asoshi telemtetba agiba sülen ULFA rongnung telemsa adok aser India kübok melii Asom nüjiso asoshi raratsü mulungtetter telok balaka aküm aser iba telok nung Dr.Mukul Hazarika ya mendenbuba asütsü shimtet. Tangbo joko ULFA (I)  tongti lenir anaprongla tenüng aser taliba tesem ajak jangjar asünungji, Dr.Mukul aser Paresh Baruah na prongla Indiai anir arur obendangdak parnok anema ken o benoker. Aji oda, Dr.Mukul Hazarika ya London nung alir aser India o UK na tsüngda tangatettep tajung alinungji, UK-i Dr.Mukul Hazarika-ji Indiai aginüba ama melamelaa agütsütsü amai bilemer saka kechi ataloktsüar memetet. Ano, külen Paresh Buruah-bo Myanmar aser China nung dang lia senzür. Iba ama tia ka nung NIA-i Guwahati nung NIA Special Court nung ULFA (I) tongti lenir anati linük anema rara ayongzükba ken o tulu benoka lir aser kodang obendangdak nung jagi parnok aputsü obendang agütsüdir, idangjisa NIA-i UK dang ULFA lenirji meshitsü. Atangji, UK o India na tsüngda ‘extradition treaty’ yanglua lir. Tetezü, UK nung India-i bushiba ozüng raksar ka jenoka lira, iba nisungji UK-i India nem agütsütsü aser kasaji UK nüngdak nunga Indiai inyaktsü. Iba ama yimten o yimten na tsüngda tangatettep junga yanglua alinungji NIA-i ULFA (I) mendenbubaji UK nungi melamelaa anir arutettsü amai bilemer. Atangji, tang tashibo ULFA (I) mendenbuba Dr.Abhizeet ta ajabaji shitakba London nung alisang Dr.Mukul Hazarika-jia tabo meshitet, kechiyong paji India-i anir arua ano ken o asüngdang metenzük. Ano külen, Paresh Baruah atemaji India-i Myanmar den jembia pua bener arutsü merangya alitsü. Atangji, Paresh Baruah-ji China nung alinungbo, India asoshi pa anir arutsübaji tasak asütsü, kechiyong India o China na tsüngda iba ama tebilemtsü maparen nung yariteptsüsabo tangatettep junga mali ama reprangtetter. Tamalenbo Paresh Baruah yabo Bangladesh nung senso küma lia liasü, saka tangbo pa yangjia oa melitetter, kechiyong yangjia pai raraba hadir shibelenba maparen nung tasüba temerenshi agütsütsü obendang agüja lir. ULFA (I) tongti lenir anaprongla ya linük ozüng kübok meliteti jenshia jenbonga senzürtem ta NIA ajanga sangdonga lir. Aji oda, tang NIA ajanga parnok obendangdak ULFA (I) tongti lenir ana anema ken o benoka alibaji tatembang kati arua jembir külen UK nungi Dr.Mukul Haziraka-ji anir arutetra, ibaji India asoshi takok tuluka asütsü saka ULFA (I) telok asoshibo timtem lendong tetenzüker asütsü. Atangji, Arabinda Rajkhowa-i aniba ULFA telokia India government den yimjung nung Assam yimten temeten dak keta aliba ken o takok ngua jembia aoba osangbo kecha mangashir. Assam nung ULFA telok tentetter Asom yimten nüjiso asoshi raraba tongpang nung tai maketba nisung taküm aika samaogo aser rongsen tsütsüa tesama aser takoksa tuluka ajuruogo. Item lendong timtem atalokba anogotem aser mapatem mamai ULFA telok anapronglai Assam asoshi tajung bilema inyaktsü tim. Iba tangatetba nung ULFA(I) telokia India governent den yimjung nung ajurutepa jembitsü mulungtsüla aser India government-ia parnokji mapudang aser memerenshidang yimjung nung ken lemtepdagi arutsüsa mapang agütsütsüla.