ULFA-i BJP nem vote magütsütsü tuyur

Guwahati, March 29 (Agencies): United Liberation Front of Assam (Independent) teloki tan-a ano Bharatiya Janata Party (BJP) anemtsü tenzükogo.

April 4 aser 11 anogotem nung Assam Assembly election mapang state nübur shingai BJP aser BJP den sentaktepa aliba party tem nem vote magütsütsüla, ta ULFA-i state nüburtem dang shiogo.

BJP dang nungi telangzüba aika meshiba ULFA (I) telok nung lenir Paresh Barua-i BJP nungi Chief Minister atema tokteptsü aliba Sarbananda Sonowal anemer apusogo.

ULFA (I) ya Assam state atema nüjiso atema raraba telok ka lir aser parnoki teküpoklen agüja aliba tasüngdangba tem nung telangzüba tajung aginüa BJP dang asüngdangogo:

1) Bhutan forces temi mita aoba, ‘All Clear’ sentong sülen ULFA züngsem 16 tashi samaba atema BJP-i telangzüba agütsütsüla, 2) Tesüiba mapang All Assam Students Union (AASU) lenir Sarbananda Sonowal-i Ahom litsü nung ‘Jai Ahom’ ta ashitsü melena kechiba ‘Bharat Mata ki Jai’ ta ashir?. 3) Asom Gana Parishad (AGP)-i yimsü asüba mapang miima nisung tepseter metepset ibaji jangjatsütsü nüngdak aser 4) BJP-i item telangzüba magütsü sür nüburtemi parnok nem vote agütsüra lendong tulu adoktsü.

State nung election akatsü sangdongli nungi Union Minister of Youth Affairs & Sports, Sonowal aser BJP lenir Himanta Biswa Sarma na inyaksangshi ajak ULFA-i kanga mitdar, ta ULFA (I)-isa metetdaktsü.

ULFA (I)-isa, BJP-i ULFA (I) aser tang State nung yimsü tesüdak Congress telok amalitepa aoer ta aitsüogo.

Sonowal-i ULFA züngsem ashiokja 1986 May ita nung Dibrugarh University nung kaketshirtem lenir Saurav Bora tepsetdaktsü, ta ULFA (I)-i pa aitsüogo.

Parnokisa ashiba agi, iba tepsetba maparen ya parnok lenir Baruah dang nungi temelaba magi inyak.

Saurav Bora tepsetba ken o nung Gauhati High Court-i Sonowal tai mali kümtsü.

Margherita constituency nungi BJP candidate aser tesüiba mapang ULFA züngsem Bhaskar Sarma election asoshi nüboyim sentong nung adenba asoshi ULFA (I)-i Sonowal aitsü.

Bhaskar Sarma ya külakkübong nisung aser meima nisung tepseter ka lir, ta parnoki ashi.

Osang ajanga ashiba agi, ULFA (I)-i BJP dang Sarma majungba indang shiogo ajisüaka pa BJP ticket anguba sülen ULFA telok kanga mepelar aser ibaji ajanga parnoki lenir anaprong anemtsü tenzük.