Ulfa-I-i Chabua air base amaktsü tasa atong: Army

Dibrugarh, Aenjeti (January) 16 (Agencies): Ulfa (Independent)-i Republic Day matongdang Pathankot amakba mesüka Chabua air force station amaktsü tasa atonga lir ta osangbener ka dang asüngdangya asüdang putet.
Ulfa(I) den tesentaktep lir ta temulung melemi bilemba osangbener Swarup Jyoti Chetia dang asüngdangya asüdang iba osang metet, ta Army ketdangsertemi ashi.
Chetia ya local news channel ka aser Assamese osangkaket ka atema osangbener lir aser pa Küptoknü (Honibar) 9th Rajputana Rifles aser Assam Police-i apu.
Chetia apuba sülen idakji alirtemi Chabua nung NH-37 mokdanger pa chiokang ta takhangba agütsü.
Chetia’er kibongia Chabua police station nung FIR ka benok aser iba nung pa tai maket sernung sepaitemi apu ta zülua liasü. Pa pur tasüngji okadak kati pa bail nung chiok.
Tesüiba ita asem tashi Chetia ya Research and Analysis Wing (RAW) aser Intelligence Bureau (IB) ketdnagsertemi mita aru, ta Army ketdangser kati ashi.
“Pai phone ajanga Ulfa (I) leader Bhaskar Gogoi (Astitwa Asom) dangi defence installations indang osang sangoktsü. Assam Vidyapeeth, Chabua nung azüngdang Gogoi ya par class pur liasü” ta ketdangserisa shisem.
Chetia-i Gogoi den yaritepa Republic Day matongdang Pathankot amakba ama Chabua air force station amaktsü tasa atong ta nangzükogo.
Chetia-isa Ulfa(I) dang shishilembartem- Munim Phukan aser Shyam Gohain na dena tangartem dang tashiyim agi sen meshitsü atema tenüng agütsü, ta Army ketdangserisa shisem.
Ano külen, osangbener Chetia-i ashiba agibo pai Ulfa(I) indang tasatem ashitsü atema army dangi ao.
“Ulfa (I) züngsemtemi kü dang security forces aser tongtipang defence installations indang osang asüngdang. Tesüiba ita asem tashi parnoki kü den phone ajanga jembia aruogo. Hopta ka tejakdang ni Chabua police station dang kü dangi phone asüba indang osang metetdaktsü. Ajisüaka, Army-i police dang meshii ni apu” ta Chetia-i ashi.