ULFA-I-i lanurtem anioker: Assam DGP

Guwahati, May 13 (Agencies): Ozüngi nokdangba aliba ULFA-I teloki Assam kübok tesem balala nung lanurtem anioker, ta Director General of Police Mukesh Sahay-i ashi.
“ULFA-I-i maneni Assam kübok tesem balala nung lanurtem anioker aser parnok commander-in-chief Paresh Barua-i Myanmar nungi tetuyuba agüja ketdang asür” ta Assam DGP-i Tezpur nung Army 4 Crops Headquarters nung senden ka amendang metetdaktsü.
Sonitpur district aser Assam kübok tesem balala nung National Democratic Front of Bodoland (Songbijit) anema mapa inyakdar. Tan ita tatemlen Prime Minister Narendra Modi-i Assam semdangi arutsü aliba atema onoki telungpurtem anema mapa tashitaitba inyaktsü tenzükogo, ta paisa shisem.
“Bangladesh nung telungpur telok Jamatul Mujahaddin mesükba teloktem anema mapa inyakba agi, ULFA-I aser NDFB-S teloktemi Assam nung tensa mejungi kümdaktsütsü merangtsü akok. Anungji, security force temi iba tebilemtsü retreta agitsüla” DGP Sahay-isa ashi.
Hopta ana tsüngda Guwahati yimdong nung close circuit cameras enoktsü, ta paisa metetdaktsü.
Senden amenba sülen osangbener den jembidang, Assam Chief Secretary V K Pipersenia-i “sorkar mapa inyaker kar danga pei den temapur ketdangser indang inyakyim nung mepelaba lira mesüra temeten mongui lira, social media sabang nung masü saka kü nem mesüra DGP special branch nem osang sangokjang” ta ashi.
May 26, 2017 nü Prime Minister Modi-i Assam semdangtsü asoshi sentong aliba dak sendakba nung iba senden ayonga amen.
Senden nungsa Assam aser Arunachal Pradesh tsüngda aser ano Nagaland dena arrtsü onüktem benoka lemsatep, ta sorkar osang ka ajanga ashi.