Ulfa (I) teloki Assam nung BJP lenir jabaso, Kuldeep chiokogo

Guwahati (Assam), September 09 (Agencies): Hokolbarnü Ulfa (Independent) teloki Assam BJP panchayat lenir, Ratneswar Moran’er jabaso, Kuldeep Moran Arunachal Pradesh nung India-Myanmar arrtsülen chiokogo.
Kuldeep ya August 1, 2016 nü apuba sülen telungpur telok jagi pa taküm melen sen crore 1 khanga liasü. Ulfa(I) lenir, Paresh Baruah-ibo, Kuldeep ya sen akhangtsü atema apuba masü saka Army nem osang agüja ozü züngsem aika tepsetba atema okatsü asoshi apuba lir, ta jembia liasü.
Kuldeep tebu, Ratneswar Moran ya Tinsukia district panchayat nung tatong Tir lir aser pai, par chir chioktsü atema telungpurtemi sen crore 1 khanga liasü, ta ashi.
Ajisüaka tesülen Paresh Baruah-i osagbenertem dang, Kuldeep-i Army nem osangtsüsang metetdaktsüba aser Arunachal Pradesh nung par züngsemtem mita reprangba atema apu, ta ashi.
“Onok indang okadak pa den ken o akatsü. Pa metena lira chioktsü. Nisung melen onoki sen akhanger ta osang prokba ajakji tai,” ta Baruah-i ashi.
Kuldeep puer aoba tesem, Changlang district nung Assam Police aser Arunachal Police na senteper taoba ita ka piyong pa bushia liasü.